Media
“Millətimiz ən pis vaxtda bu fəlakətlə qarşılaşdı. İnsanlar yuxuda olan zaman evləri qəfildən başlarına yıxıldı. Qarlı qış, şaxtalı və soyuq hava isə insanların işini daha da ağırlaşdırdı. Hər hansı bir tədbir görüb, bu faciəli vəziyyətin qarşısını ala bilmədik. Bu səbəbdən dəhşətli nəticələrlə qarşılaşdıq”.
Bu sözləri Türkiyəli analitik, jurnalist Güngör Yavuzaslan Medianews.az-a təbii fəlakət haqqında danışan zaman qeyd edib. O bildirib ki, xilasetmə və axtarış işləri sürətlə davam edir:
“7,4 bal gücündə olan zəlzələ 10 əyalətdə öz dağıdıcı təsirini göstərdi. 7 kilometr dərinlikdə baş verən fəlakətin belə gücdə olması dağıntıların şiddətinin daha da artmasına səbəb oldu. Elə buna görə də, inanılmaz və faciəvi nəticələrlə üzləşdik. Ən pisi isə odur ki, təkanlar hələ də davam edir. Hündürmərtəbəli yaşayış evləri anidən uçulmağa başlayır. Bir də görürük ki, neçə-neçə bina qəflətən toz-dumana qarışıb, yerlə-yeksan olub. Türkiyə təbii fəlakət ölkəsidir. Bu səbəbdən həmişə olduğu kimi bu dəfə də fövqəladə fəlakətlərin idarə edilməsi üçün xüsusi üsul tətbiq edilir. Prezident Ərdoğanın koordinasiyası ilə xilasetmə və axtarış işləri sürətlə davam edir”.
Jurnalist Güngör Yavuzaslan Azərbaycanın dəstək göndərməsinə belə reaksiya verdi:
“Azərbaycan dövlətimizin ilk yardım çağırışına ən tez cavab verən ölkələrdəndir. Hətta ilk dövlətdir. Əvvəlki fəlakətlərdə olduğu kimi, indi də qısa müddət ərzində Azərbaycanın yardım qruplarının zəlzələ bölgəsinə gəlməsi gözlənilir. Bu xəbər bizi ümidləndirir. İnanırıq ki, qardaş ölkənin köməyi ilə bu fəlakəti də geridə qoyacağıq”.
Aytac Şahin
Medianews.az
