Media
Türkiyənin cənubunda və Suriyanın şimalında baş verən 7,8 bal gücündə zəlzələ nəticəsində azı 400 nəfər dünyasını dəyişib. Zəlzələ Türkiyə vaxtı ilə saat 04:00 radələrində baş verib. Yeraltı təkanlar ölkənin səkkizdən çox vilayətində hiss olunub. Hazırda əsas diqqət mərkəzi Türkiyəyə yönəlib.
Belə bir məqam da Anadolu Yayınçılar Dərnəyinin başqanı Sinan Burhan Medianews.az-a açıqlamasında Türkiyənin hazırda ağır bir dönəmdən keçdiyini bildirib:
“Bugün səhər saatlarında Kahramanmaraşın mərkəzində baş verən 7,4 bal gücündə zəlzələ həqiqətən də böyük dağıntılara səbəb oldu. Gecə saatlarında Türkiyənin Kahramanmaraş bölgəsində 7,4 bal, Qaziantepdə isə 6,5-6,4 bal gücündə zəlzələ baş verdi və bu da təsirsiz ötüşmədi. Təbii fəlakət zamanı Malatya, Diyarbakır, Adana, Hatay, Kilis və Osmaniye vilayətlərində binalar dağılıb. Vilayətdə dağıntılar sərt şəkildə özünü göstərdi, indi yörd yüzə yaxın şəhidimiz var, minlərlə yaralılar o ağır və çökən binaların altından xilas edilib. Vəziyyət bir qədər gərgindir. Qeyd etdiyim rəqəmlərin artacağından narahatıq. Belə gündə dost və qardaş ölkə Azərbaycan 350 nəfərlik heyətlə dəstək göndərdi. Bir neçə dəqiqədən sonra həmin dəstək qüvvələri Türkiyədə olacaq.
İndi Türkiyəyə axtarış qrupları gəlir, başqa ölkələrdən dəstək üçün gələnlər var. Çətin günlər yaşayırıq. Belə günlər Azərbaycan dövlətinin türk xalqı olaraq birlik və həmrəylik günləri oluğunu əminliklə deyə bilərik. Hər birimiz belə günlərdə bir fərd olaraq bir-birimizə dəstək göstəririk… Birlik olub, yaralarımızı sarmağa çalışırıq. Dövlətimiz güclüdür, lazımi işlər görülür. Allah dünyasını dəyişənlərə rəhmət etsin. Yaralılara isə Allahdan şəfa diləyirəm”.
Xəyalə Rəis
Medianews.az
