Türkiyəli media rəhbərindən ÇAĞIRIŞ: “Vəziyyət çox kritikdir, böyük köməyə ehtiyac var”

“Hazırda böyük bir fəlakət ilə üz-üzəyik. Çox sayda itkilərimiz, yaralılarımız var”.

Bu sözləri Medianews.az-a Türkiyənin “Karadeniz” xəbər agentliyi dərnəyinin sədri Hasan Yavuz Bakır Türkiyədə baş verən zəlzələnin fəsadlarından danışarkən bildirib. O qeyd edib ki, vəziyyət çox kritikdir:

“Dağıntılar altında qalanlardan heç bir xəbər yoxdur. Axtarışlar davam edir. İlk dəfədir ki, bu qədər genişmiqyaslı zəlzələ ilə qarşılaşırıq. Vəziyyəti toparlamağa çalışırıq. Lakin hazırkı durum olduqca təhlükəli və qarışıqdır. Bir çox yerlərdə afterşok baş verməsi səbəbindən çoxmərtəbəli binalar bir anda yerlə-yeksan olur. Belə halların baş verdiyi ərazilərdə vəziyyət çox kritikdir. Hava şəraiti soyuq və şaxtalı olmasına baxmayaraq xilasetmə işləri davam edir. Böyük bir köməyə, beynəlxalq yardıma ehtiyacımız var.  İlk dəfədir ki, 10 şəhərimizdə hiss edilən təbii fəlakətlə rastlaşmışıq. Təəsüflər olsun ki, itkilərimiz çoxdur. Ancaq hazırda bu barədə əlimizdə dəqiq bir məlumat yoxdur. Dağıntılar altında nə qədər insanın olduğunu bilmirik. Təbii fəlakət nəticəsində dəyən böyük zərərin qarşısında əlacsız qalmışıq”.

Hasan Yavuz Bakır Azərbaycandan göndərilən köməyin çox sevindirici hal olduğundan da bəhs edib:

“Can Azərbaycandan xilasetmə qüvvələri yola düşüb. Bu bizi olduqca sevindirir. Qardaş ölkə hər zaman bizimlə olub. Həm xoş gündə, həm də belə çarəsiz qaldığımız anlarda imdadımıza ilk çatan ölkə də məhz Azərbaycandır”.

Aytac Şahin 

Medianews.az