Media
Birləşmiş Ştatlar Əfqanıstanda qadın hüquqlarına qoyulan qadağalara cavab olaraq Taliban müvəqqəti hökumətinə əlavə viza məhdudiyyətləri tətbiq edəcəyini açıqlayıb.
Medianews.az xəbər verir ki, Xarici işlər naziri Antoni Blinken verdiyi açıqlamada Taliban administrasiyasının qadınlara və qızlara qarşı təzyiq və zorakılığına qarşı hərəkətə keçəcəklərini bildirib.
Talibanın öz qərarları ilə Əfqanıstan xalqının rifahını bir daha gözardı etdiyini vurğulayan Xarici İşlər Naziri, Talibanın hərəkətləri nəticəsində bir milyondan çox məktəb yaşlı qız və gənc qadının məktəbdən məhrum edildiyini, daha çox qadının universitetlərdən, saysız-hesabsız əfqan qadınının isə təhsildən kənarda qaldığını qeyd edib.
Talibanın hərəkətlərini ən sərt şəkildə qınadıqlarını vurğulayan Blinken, ölkəsinin qadın və qızlar da daxil olmaqla, bütün əfqanların insan hüquqları və əsas azadlıqlarının təşviqi üçün əlindən gələni etməkdə qərarlı olduğunu bildirib.
Qeyd edək ki, 15 avqust 2021-ci ildə Əfqanıstanda Taliban hakimiyyətə gəldikdən sonra qadınlar və qızlar bir çox hüquqlarından, o cümlədən təhsil hüququndan məhrumdurlar.
Taliban administrasiyası dekabr ayında universitetlərdə qız tələbələrin təhsilinin növbəti xəbərdarlığa qədər dayandırıldığını açıqlayıb.
Mehin Mehmanqızı
Medinews.az
