Media
“Cənubi Azərbaycanda baş vermiş zəlzələdən əziyyət çəkən soydaşlarımızın acınacaqlı vəziyyəti, bir millət kimi bizi çox narahat edir”.
Bu sözləri Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə Medianews.az- a bildirib.
Çingiz Qənizadə qeyd edib ki, havanın soyuq olması və soydaşlarımızın küçələrdə qalması daha ağır nəticələrə gətirib çıxarda bilər:
“Fars rejiminin zəlzələnin azərbaycanlılar yaşayan bölgədə olmasını bildikləri halda reaksiya verməmələri və insanları elementar çadırlarla təmin etməmələri, müəyyən yardımların edilməsində etinasız yanaşmaları, məhz fars rejiminin yerli türklərə, azərbaycanlılara olan münasibətinin nəticəsidir.
Ürəyimiz ağrıyır. Ancaq əlimizdən gələn bir şey yoxdur. Əgər İran höküməti Türkiyənin yardım təklifini qəbul etməyibsə, bizim də kömək etməyimizi heç istəməz.
Çünki İran- Azərbaycan münasibətləri, Azərbaycanın İrandakı səfirliyində baş vermiş terror aktı ilə daha gərginləşdi.
Təbii ki, bunun da bütün məsuliyyəti və günahı İran hakimiyyətinin üzərinə düşür. Səfirliyimizin təhlükəsizliyini qorumaq onların üzərinə düşsə də, buna laqeyd münasibət göstəriblər.
Vəziyyətlə bağlı çox güman ki, hər hansı müraciətlər olunacaq. Dərman, ərzaq və digər avadanlıqlarla soydaşlarımızın təmin olunması məqsədə uyğun olar. Bəs bunu İran tərəfi qəbul edəcəkmi?
Mənə elə gəlir ki, onlar buna razı olmuyacaq.
İnanıram ki, Güneydəki soydaşlarımıza yardımların edilməsi ilə bağlı təşəbbüs olub və yaxud da olacaq. Amma bu yardımların edilməsi bilavəstə İran hökümətindən aslıdır.
Allah vəfat edən soydaşlarımıza rəhmət etsin ,yaralılarımıza şəfa versin!. Tezliklə bu problemlərdən yaxa qurtarmağı soydaşlarımıza arzu edirəm!”.
Mehin Mehmanqızı
Medianews.az
