“Minlərlə insanın aqibəti İranın olmayan mərhəmətinin ümidinə buraxılmamalıdır”
Yanvar 29-u İranın Xoy vilayətində baş verən zəlzələ nəticəsində evləri dağılan soydaşlarımız acınacaqlı vəziyyətdədir.
İran tərəfi isə laqeyd qalaraq yenə də düşmən mövqeyini göstərməkdə davam edir.
Məsələ ilə bağlı Medianews.az-a danışan politoloq Yeganə Hacıyeva bildirib ki, zəlzələ olan yerlərdə təcili atılmalı olan addımlar var:
“Dağıntılar arasından insanların çıxarılması, onların isti geyim və qida ilə təmin olunması, ən əsas onların təhlükəsiz yerlərə daşınmasını təmin etmək üçün müvəqqəti sığınacaqlara yerləşdirilməsi atılmamlı olan ən vacib humanitar addımlardandır.
Çox təəssüf ki, İran hakimiyyəti isə heç bir addım atmayıb, yardım göstərməyib, əksinə dəstək tələb edən çarəsiz insanlara qarşı zor tətbiq edib, onları su şırnağı ilə qovub.
İstər yerli, istər mərkəzi hakimiyyətin laqeyd münasibəti daha da pis fəlakatlərə səbəb olur.
Ümumi praktika belədir ki, təcili, zəruri ləvazimatların çatdırılmasını təmin edən qərargah yaradılmalı idi.
Butün bunlar İran hökümətinin üzərinə düşən vəzifəsi, onların məsuliyyəti idi”.
Politoloq bildirib ki, nə yerli, nə də mərkəzi hakimiyyət üzərinə düşən öhdəlikləri yerinə yetirmir:
Hər hansı bir bölgədə zəlzələ olduğu zamanlarda beynəlxalq təşkilatlarların da atmalı olduğu addımlar var.
Bu hallarda BMT və digər humanitar təşkilatlar var ki, onların nümayəndəlikləri zəlzələ baş verdiyi ərazilərə ezam olunurlar. Zərər görmüş əhalinin müdafiəsinin davamlı təşkili üçün əllərindən gələn köməyi göstərirlər.
Çox təəssüf ki, İran hakimiyyəti kənardan edilən bu köməyi də qəbul etmir. Belə olan halda, təcili atılmalı olan addımlar var.
Onlardan biri də BMT səviyyəsində İran hökümətinin zəlzələdə əziyyət çəkən vətəndaşların konstitusion haqqı olan, lazimi və zəruri yardımın təmin edilməsi ilə bağlı çağırış edilməlidir.
Zəlzələ yerindən çəkilən videogörüntülərdən aydın olur ki, zəlzələyə məruz qalmış insanlar çox acınacaqlı vəziyyətdədirlər. Psixoloji zədələr alıblar, şok içindədirlər. İranın addımları isə onları müdafiə etmək təşəbbüslərindən kənar, laqeyid münasibətdir. Ona görə də beynəlxalq humanitar təşkilatlar İranda zəlzələdən əziyyət çəkən şəxslərin müdafiəsi yönündə bir sıra addımlar atmalıdır.
İran hakimiyyətinin indiki davranışı, etnik azərbaycanlılara göstərdikləri həmişəki repressiv davranışın növbəti nümayişidir.
İran bu münasinəti etirazlarda aydın göstərib, etirazlarda ən çox öldürülənlər azərbaycanlılardır.
Baxmayaraq ki, etirazlar ölkənin hər yerində keçirilir, ən çox güc və təhlükəsizlik qüvvələri olaraq azərbaycanlılar yaşayan ərazilərə toplaşıb. Etirazlarda ən çox həbs olunanlar da azərbaycanlılardır.
İranın zəlzələdən əziyyət çəkən öz vətəndaşlarına münasibətdə etnik ayrıseçkilik tətbiq etməsi, sərt qınanmalı və minlərlə insanın aqibəti İranın olmayan mərhəmətinin ümidinə buraxılmamalıdır.
BMT səviyyəsində İran hökümətinin zəlzələdə əziyyət çəkən vətəndaşların konstitusion haqqlarına hörmət etməyə, onları lazimi zəruri yardımın təmin edilməsi ilə bağlı çağırış edilməlidir.
Medianews.az