Media
Şokolad kiçikdən-böyüyə hər kəsin bəh-bəhlə yediyi qidalardan biridir. İllərdir bu məhsulun insan səhhətinə faydalarına görə superfood kateqoriyasına daxil edilib-edilməməsi ilə bağlı çoxlu müzakirələr aparılır.Elmi cəhətdən təsdiq edilməsə də, şokoladın insan orqanizminə ciddi müsbət təsirləri olduğu şübhəsizdir. Lakin nəzərə alsaq ki, satışda olan şokolad məhsullarının hamısı yüksək keyfiyyətdə deyil, bu zaman onların insan orqanizminə təsirinin də eyni olmadığını unutmamalıyıq.
Bazarda mövcud olan saysız-hesabsız şokolad növlərini görəndə, onlardan hansının digərlərindən daha sağlam olduğunu düşünürük. Bu zaman dad faktoru da bizim üçün önəmli rol oynayır. Şokolad məhsulu almamışdan qabaq bizi cəlb edən onun dadlı görünüşü olur. Zənn edirik ki, əgər dadlı görünürsə, həm də xeyirlidir. Lakin bu yanaşma doğru deyil. Açıq rəngli şokolad çeşidlər, məsələn, südlü və meyvəli olanlar nə qədər dadlı olsa da, onların istehsal prosesində həddən artıq şəkər və qatqı maddəsindən istifadə edilir. Bu nüans dad amilini önə çıxarsa da, sağlıq baxımından bizim üçün o qədər də faydalı olmur. Ağ şokoladın yeganə üstünlüyü isə tərkibinə süd qatılmasıdır. Südün daxilində kalsium adlanan vitaminin olması da bu çeşidi bizim üçün az da olsa faydalı hala gətirə bilir.
Bəs bizim üçün faydalı olan şokoladı necə ayırd edə bilərik?
Şokolad alarkən, tərkibindəki kakao nisbətinin nə qədər yüksək olduğuna baxmaq vacibdir. Bunu öyrənmək üçün isə məlumat hissəsində yazılanlara diqqət edilməlidir. Bu yolla siz istəmədiyiniz süni dad və əlavələr haqqında da məlumat əldə edə bilərsiniz. Tərkibində ən azı 70% kakao olan şokolad növləri sağlamlığa faydalı məhsul hesab olunur.
Bədənimiz yalnız yaşamaq üçün deyil, həm də inkişaf etmək üçün qida maddələrinə ehtiyac duyur. Tünd şokolad yüksək dərəcədə maqnezium, dəmir, mis, manqan, kalium və sinklə zəngindir.Bu da orqanizmin inkişafı üçün bir neçə amilin eyni qidada toplanması deməkdir. Bütün bunlarla yanaşı şokoladın tərkibində həm də, bol miqdarda kalori mövcuddur. Kilo almamaq üçün bu önəmli məlumatı da nəzərdən qaçırmamalıyıq.
Şokoladın xeyirlərindən biri də yaddaşını itirən şəxslərə yaxşı təsir göstərməsidir. Bitter adlanan şokolad növü beyinin sürətli inkişafına şərait yaratdığı üçün hafizəsində problem olan şəxslərə bu qida olduqca xeyirlidir. Acı şokolad qatqısız sayıldığından beyinlə yanaşı həm də ürəkdə yaranan problemlərə də inanılmaz dərəcədə təsir göstərir. Bunu şokoladın tərkibindəki antioksidantlara borcluyuq. Müntəzəm olaraq şokolad istehlak etmək insan bədəninin xəstəliklərlə mübarizə aparmasına kömək edən bütün antioksidanları bir araya gətirməsinə səbəb olur.
Şokoladın faydaları saymaqla itmir. Tünd şokoladın dərini yaxşılaşdırdığını və qocalma prosesini yavaşlatdığını bilirdinizmi? Tünd şokoladın tərkibində polifenollar olduğu üçün dəriniz radiasiyaya və günəş işığının zədələnməsinə qarşı daha davamlı olur. Estetikaya gəldikdə isə tünd şokolad dərinin ləkəli görünüşünü azaldır və quruluğa yaxşı təsir göstərir. Bundan əlavə, tərkibindəki sink və dəmir dəridə olan hüceyrə inkişafını dəstəkləyir.
Aytac Şahin
