Ötən ilin son 11 ayı ərzində qeydə alınan statistikaya, əsasən, boşananların sayında azalma müşahidə olunub. Belə ki, Dövlət Stataistika Komitəsindən verilən məlumata görə, ötən ilin yanvar-noyabr aylarında qeydiyyat şöbələri tərəfindən 57033 nikaha daxilolma və 14525 boşanma halları qeydə alınıb. Yəni, əhalinin hər 1000 nəfərinə 2021-ci ilin müvafiq dövrü ilə müqayisədə nikahların sayı 5,5-dən 6,2-yə qədər artıb, boşanmaların sayı isə azalaraq 1,7-dən 1,6-ya düşüb.
Sosioloq Lalə Mehralı Medianews.az-a mövzu haqqında danışarkən qeyd edib ki, boşanmaların sayında azalmaların olması müsbət haldır:
“Bəzən nikahdan kənar ailə quran şəxslərin ayrılması halları bu statistikaya yansımır. Yaxşı olar ki, gələcəkdə bu məsələ də nəzərə alınıb statistika qeydə alınsın. Ümumilikdə isə boşanmaların sayında qeydə alınan azalmalar olduqca müsbət haldır. Hesab edirəm ki, bu mövzuda məhkəmələrin böyük rolu var. Hakimlər cütlükləri mediasiya şurasına yönləndirdikdən sonra boşanmaların sayında azalma nisbəti qeydə alınmağa başlayıb. Bunun da səbəbi tərəflərin bir-birilə uzlaşmağa getdiklərini göstərir. Mediasiya şurasında boşanmaq istəyən cütlüklər ekspertlərin rəyini alıb, peşəkar məsləhətlər dinləyirlər və əslində ailəni qorumağın mümkün olduğunun daha yaxşı dərk edirlər. Təbii ki, bu cür yardımlar göstərildikdən sonra ailəni xilas etmək olur”.
Ekspert təklif edir ki, mütləq şəkildə ailələrə psixoloji dəstək göstərən mərkəzlər yaradılmalıdır:
“Bəzən çox kiçik səbəblər ucbatından evli cütlüklər yollarını ayırmağa qərar verir və nəticədə ailələr dağılır. Bunun da əsas səbəbi tərəflərin psixoloji yardım ala bilməməsinə görə cütlüklərin bir-birinə yüklənməsidir. Sonda isə ailədə birlik məhfumu getdikcə yoxa çıxmağa başlayır və ailələr üst-üstə yığılan problemlərdən çıxış yolunu boşanmaqda görür. Boşanmaların sayını daha da azaltmaq üçün ailələrə psixoloji dəstək göstərə biləcək mərkəzlərin yaranmasına çox böyük ehtiyac var. Proses boşanmaya qədər gedib-çatmadan problemləri həll etmək cütlüklərə psixoloji yardım edib, onları bu fikirdən daşınmağa sövq edə bilər”.
Aytac Şahin
Medianews.az