Cənubi Afrika, Rusiya və Çin birgə təlimlər keçirəcək

Cənubi Afrika Respublikasının gələn ay ölkənin şərqindəki Hind okeanı sahilində Rusiya və Çinlə birlikdə 10 günlük dəniz təlimi keçirəcəyi açıqlanıb.

Medianews.az bildirir ki, Cənubi Afrika Milli Müdafiə Qüvvələrindən (SANDF) verilən açıqlamada, Cənubi Afrika donanmasının 17-də ölkənin şərqindəki Durban və Riçard Körfəzi sahillərində Rusiya və Çin donanmaları ilə birgə təlimlər keçirəcəyi açıqlanıb.

Açıqlamada “Mosi” adlı təlimə Cənubi Afrika ordusundan 350 şəxsi heyətin qatılacağı paylaşılıb. Mosi ölkənin yerli dillərindən biri olan Tsvanada “tüstü” deməkdir.

2019-cu ildə Cənubi Afrika donanması ölkənin cənub-qərb hissəsindəki Keyptaun sahillərində Rusiya və Çin donanmaları ilə birgə təlimlər keçirib.

Braziliya, Rusiya, Hindistan, Çin və Cənubi Afrikadan ibarət BRİKS qrupuna 2023-cü ildə sədrlik edən Cənubi Afrikanın Rusiya və Çinlə güclü əlaqələri var.

Rusiyanın xarici işlər naziri Sergey Lavrovun yanvarın 23-də Cənubi Afrikaya səfəri planlaşdırılır.