Media
Hə, deyəsən, bu ili də yavaş-yavaş başa vururuq. Bayrama son bir gün qalıb. Yeni ili qarşılamaq üçün 1 ay qabaqdan canfəşanlıq edirik. Axı bir xalq olaraq bayramları xüsusilə sevirik. Amma…
“Amma”sını deyəndə sevincimiz qursağımızda qalır. Fikirləşəndə ki, hər şeyin qiyməti qalxıb, bahalaşma da trendə çevrilib, məyus halda oturursan oturduğun yerdə…
Bəzən uşaq olub Şaxta babadan möcüzələr istəyirsən ki, bəlkə, çin olar arzuların. Lakin sən saydığını say, gör Şaxta baban nə sayır.
Gör vəziyyət nə yerdədir ki, Şaxta baba belə, saatı 200 manatdan aşağı səni təbrikə gəlməz. Hər zaman uşaqlara xoş təbəssüm yaşadan babamız da, öz aramızdır, bahalaşma trendi ilə ayaqlaşır. Elə Qar qızı da qoşulub ona.
Hələ “yolka”nı demirəm… İstədiyin ölçüdə 200 manatdan aşağı yolka tapsan, papağını göyə atarsan. Nə edək? Bütün bunlar Yeni il bayramının atributlarından olsa da, onlarsız da keçinmək olar.
Bir xalq kimi, “Bayram simvollarımız olmasa da olar, əsas qarnımız tox olsun” deyib, yollanırıq bazara. Amma burada da istəklərimiz istək olaraq qalır. Sevincək gedirsən bazara. Nə gözəl! Hər şey var, heç nə yox. Necə yəni yox? Naz neymətin içində heç nə yox? Nemət var ey, onu almağa pul yox… Ətə, toyuğa, balığa yaxınlaşırsan, dilin topuq vurmağa başlayır, ayaqlarını hiss etmirsən. Elə güc-bəlayla düzəlirsən yoluna ki, digər məhsullara baxasan, qalırsan məəttəl. Yağ ət qiymətinə, pendir yağ qiymətinə, yumurta çörək qiymətinə. Elə deyinə-deyinə bir də baxırsan ki, bazarın sonundasan. Nə almısam, nə də dadmısan…
Burada eşidirsən ki, kimsə səni səsləyir: “Yaxşı göyərtilərimiz var,10 dənəsi 1 manata”. Deyirsən ki, şükür, nə əcəb göyərtinin qiyməti qalxmayıb? Belə də ki, qalxsa nə olar, qalxmasa nə olar? Nə qədər “otlayasan”? Heç olmasa, bayramda yox da…
Qaçaraq bazarı tərk edib, yollanırsan marketə. Ümidlə gedirsən ki, oradan nə isə tapasan. Amma nə fərqi var: keçəl Həsən, ya Həsən keçəl? Hə, bir fərqi var. Deməsəm, günah olar. Daha gözəl, zövqlə bəzədilmiş market ilk görünüşdən göz oxşayır. Rəngarəng endirim kampaniyaları adama “gəl-gəl” deyir. Hələ 1 manata olan məhsulun 99 qəpiyə olduğunu görəndə elə bilirsən, sənə bütün marketi hədiyyə edəcəklər. 1-2 qəpik endirimi ilə manipulyasiya edən marketinq qaydarı sənin olan-qalan 200 manatına “quş qoyur”, sən də “uça-uça” gedirsən. Bu da olur sənin bayramın.
İstəyirsən baş götürüb qaçasan rayonlara, bəlkə, Bakıdan küsüb, Sahara səhrasına belə yağan qarı oralarda görüb sevinəsən, amma hay-hay!.. Oradakı qiymətlər nəinki əl yandırır, bütün nəslinə od qoyur… Bu qiymətlərə ata-babalarımız “bir kruq” xarici ölkəni gəzib gəlirdilər, özü də iki gün yox, azı bir həftə…
Ehh… Nə isə… Təki hər zaman bayram olsun. Xalqımız, millətimiz var olsun. Ölkəmizdə sülh, əmin-amanlıq olsun. Suriya, Ukrayna kimi ölkələrə baxıb, öz günümüzə şükür edərik…
Yeni ilə yeni ümidlərlə… Xoş gəldin, 2023! Yanında səfa da gətir..
