“Euronews kanalında 1915 –ci il dırnaqarası erməni genosidinə həsr olunmuş filmin çəkilməsi və nümayişi təəssüf doğurur. Bunun qarşılığı olaraq çox az sayda filmlər istehsal edirik, ümumiyyətlə etmirik. Əsgərlərimiz cəbhədə həlak olursa biz isə heç olmasa bu sahədə fədakarlıq göstərməliyik. Amma…”
Bu sözləri Medianews.az-a açıqlamasında tanınmış rejissor Namiq Ağayev bildirib. O, qeyd edib ki, filmlərə pul tapılmadığı üçün ayrılan maliyyəyə min yerdən göz dikilir:
“Artıq neçə gəldi filmlər çəkilmir. Kino aləmində dəyişikliklər baş verir və yeni bir səhifə açılıb. Bu səhifədə biz nə yazacağıqsa o da olacaq.
Hər şeyin sonu olan kimi komediya janrının da sonu olmalı idi. Bayağı komediaların sayı çox idi və buna son qoyulmalı idi. Danmaq olmaz ki, yaxşı filmlər də var idi. Ümumiyyətlə normal film çəkilməlidir. Komediya filmləri kassaya hesablanıb. Əsas məsələ ortalığa yaxşı kino çıxarmaqdır. Eşq filmi ən ucuz başa gələn filmdir. Amma böyük həssaslıq istəyir. Komediada isə vəziyyət başqa cürdür, burada risk payı azdır.
Film sahəsində müəyyən problemlərimiz var. Misal üçün burada qohum əqrabaya, tanışlığa daha çox üstünlük veririk. Bu da bizi inkişafdan saxlayır. İncəsənət risk, cəsarət tələb edən bir sahədir. Riskdən qorxaraq ancaq komedianın dalına düşmək düzgün deyil. Tamaşaçı zövqünü korlamaq olmaz. Bizim cəmiyyət normaldır. Heç bir dünya tamaşaçılarında əskik deyil.
Kinoteatrların yeni janrlarla, yeni filmlərlə gəlməsinin sayı azalacaq. Çünki sosial şəbəkələrdən hazırda daha çox maliyyə əldə edirlər. Əslində bu sahə də ələnib. Daha asan qazanma halları yaranıb deyə kino, teatr sahəsi təmizlənib.
Bizim baxış tərzimiz də dəyişib. 44 günlük müharibədə qalib gəldik. Buna görə də bizdə qüdrət, özümüzə inam hissi yaranıb. Ona görə də “meşşan tipli filmlər” rəqabətə tab gətirmir. Çüki yalandan qəhrəman yaratmaq olmur. Çünki biz sosial şəbəkələrdə əsil qəhrəmanlıq göstərən igidlərimizi görürük. Ona görə də təmizlənmə sezilir. Əslində güldən-çiçəkdən yox müharibədən film çəkin. Belə məsələləri işıqlandırmaq, qabartmaq lazımdır”.
Mehin Mehmanqızı
Medianews.az