Media
Medianews.az xarici mətbuata istinadla xəbər verir ki, Rusiya prezidenti Vladimir Putinin yaratdığı “Vahid Rusiya” partiyasının keçmiş deputatlarından biri, nəhəng kolbasa şirkətinin sahibi Pavel Antov istirahətə getdiyi oteldə dünyasını dəyişib.
Mətbuatda yer alan xəbərə görə, 66 yaşını qeyd etmək üçün dostları ilə getdiyi Hindistanın Rayaqada bölgəsində lüks oteldə qalan Antovun 3-cü mərtəbədəki pəncərədən yıxılaraq öldüyü bildirilib.
Verilən məlumata görə, Vladimir vilayətində yerli deputat kimi fəaliyyətini davam etdirən və ölkənin ən zəngin siyasətçilərindən biri olan Antov ağır bədən xəsarətləri ilə otelin hovuzunda tapılıb və aparıldığı xəstəxanada dünyasını dəyişib.
Rusiya mətbuatı hadisənin intihar ola biləcəyini yazsa da, ötən həftə Hindistanda istirahətə getdiyi Antovun dostlarından birinin infarkt nəticəsində ölməsi suallar yaradıb.
Antov Putini Ukraynaya müdaxiləyə görə tənqid edən adlardan biri olub. Rusiyalı iş adamı Rusiyanın Ukraynaya raket hücumu nəticəsində həlak olan mülki şəxslərin görüntüləri ilə bağlı “Bunun üçün terrordan başqa ad tapmaq çox çətindir” sözləri ilə diqqət çəkib. Təzyiqlərdən sonra Antov bir addım geri çəkilərək hər zaman Putini dəstəklədiyini söyləyərək üzr istəyib.
Evli və bir uşaq atası olan Antov, Forbes Russian-a görə illik 157 milyon dollar gəlir əldə edib.
Son aylar Rusiya iş dünyasının bir çox tanınmışları adı dəqiq müəyyən edilə bilməyən səbəblərdən həyatını itirib. Sentyabrda da Rusiyanın enerji nəhəngi “Lukoyl”un baş meneceri Ravil Maqanov xəstəxananın pəncərəsindən yıxılaraq ölüb.
Müəmmalı ölümlərlə bağlı sirr pərdəsini açmaq mümkün olmasa da, bəziləri Ukrayna müharibəsindən sonra Qərbin tətbiq etdiyi sanksiyalara görə Rusiyada oliqarxlar arasında böyük rəqabətin olduğunu iddia edir.
Mehin Mehmanqızı
Medianews.az
