Media
G7 ölkələri Moskvanın müharibə maliyyəsini daraltmaq üçün bu gündən etibarən Rusiya neftinə tavan qiymətləri tətbiq etməyə başlayacaq, lakin Rusiya hasilatı azaltmalı olsa belə, məhdudiyyətə əməl etməyəcəyini açıqlayıb.
Avropa İttifaqı (Aİ) ölkələrinin əldə etdiyi konsensusdan sonra G7 ölkələri və Avstraliya cümə günü dünyanın ikinci ən böyük neft ixracatçısı olan Rusiyanın dəniz yolu ilə ixrac etdiyi neftə 60 dollarlıq tavan qiymət tətbiq etmək barədə razılığa gəliblər.
Ukrayna prezidenti Vladimir Zelenski deyib ki, Qərb ölkələrinin bu səviyyədə qiymət həddini təyin etməsi zəiflikdir, Rusiya baş nazirinin müavini Aleksandr Novak isə bu təcrübənin azad ticarət prinsiplərini pozduğunu bildirib.
Rusiyanın neft, təbii qaz, atom enerjisi və kömürdən məsul olan yüksək rütbəli rəsmisi Novak, “Biz istənilən səviyyədə qiymət tavanının tətbiqini qadağan edəcək mexanizm yaratmaq üzərində işləyirik” deyib.
G7 ölkələrinin əldə etdiyi razılaşmaya görə, Rusiya nefti tavan qiyməti olan 60 dollardan yuxarı satılarsa, o, G7 və Aİ ölkələrinin tankerləri ilə daşına bilməyəcək və ondan xidmət ala bilməyəcək.
Zelenski isə 60 dollarlıq qiymət tavanının Rusiyanın Ukrayna müharibəsində ləngiməsinə imkan verməyəcəyini söyləyərək, “Rus nefti üçün bu səviyyədə qiymət tavanının müəyyən edilməsinin ciddi bir qərar olduğunu deyə bilmərik. Terrorçu bir ölkənin büdcəsi üçün çox rahat olsun”. deyə bildirib.
Çin tavan qiymət tətbiqinə başlandıqdan sonra Rusiya ilə enerji əməkdaşlığını qarşılıqlı fayda çərçivəsində həyata keçirəcəyini açıqlayıb.
Yaponiya da bu gün elan edib ki, Rusiya xam neftinə tavan qiymət tətbiq edəcək, lakin Saxalin-2 yatağında hasil edilən nefti tətbiqdən azad edəcək.
