Media
Deputat Arzu Nağıyev Milli Məclisin Plenar iclası zamanı Fransa Milli Assambleyasının noyabrın 30-da Azərbaycana qarşı qəbul etdiyi qərəzli qətnaməyə münasibət bildirib.
Millət vəkili qeyd edib ki, Azərbaycanla bağlı Fransanın qəbul etdiyi qərəzli qətnamə ölkələrimiz arasındakı münasibətlərə daha bir zərbə və beynəlxalq hüquqa açıq hörmətsizlikdir:
“Necə ola bilər ki, iqtidarla müxalifətin təmsil edildiyi bir qurumda, yekdilliklə hamı eyni qərarın qəbul edilməsinə səs verir. 30 ilə yaxın ATƏT-in Minsk qrupunun həmsədri kimi fəaliyyətsizlik göstərən bir dövlətin yadına sülhün bərqərar olması niyə məhz indi düşüb. Ərazilərimiz darmadağın ediləndə, milli-mənəvi dəyərlərimiz tapdananda niyə Fransa hər hansı bəyanatla çıxış etmirdi?!”.
Deputatın sözlərinə görə Fransa Türkiyənin strateji tərəfdaşı olan Azərbaycanı, onun 44 günlük qələbəsini həzm edə bilmir:
“Ali Baş Komandan İlham Əliyevin Brüssel görüşü və Makronun iştirakı ilə bağlı fikirləri bir daha sübut edir ki, Fransa Prezidentinin danışıqlarda birtərəfli mövqeydən çıxış etməsi, sülhə ziyan vurmaqdan başqa bir şey deyil. Bu məkrli qərarın qəbul edilməsinin əsas səbəbi regionda qalmaq və proseslərin sonrakı gedişatında söz sahibi olmaqdır. Bakıya qarşı hansısa sanksiyaların qəbul olunması təbii ki, Azərbaycanı qorxutmur”.
