Media
20 noyabr 2020-ci il bəyannaməsinə əsasən, ermənilər Azərbaycan ərazisini tərk etdikdən sonra da öz işğalçı, separatçı siyasətlərini davam etdirirlər. Son günlərdə də Ermənistan silahlı qüvvələrinin bölmələri tərəfindən Ordumuzun mövqeləri intensiv atəşə tutulur.
Bəs görəsən 30 ildən çoxdur ki, üzləşdiyimiz bu xislət nə zamana qədər davam edəcək? İmzalanan müqavilələr, bəyənnamələrə niyə əməl olunmur? Belə davam edərsə erməniləri nələr gözləyə bilər?
Bununla bağlı politoloq Elxan Şahinoğlu Medianews.az-a açıqlamasında bildirib ki, tərəflər arasında bir neçə dəfə görüşlərin keçirilməsinə baxmayaraq, hələ də sərhədlərin delimitasiyası və demarkasiyası ilə bağlı sənəd, sülh sazişi imzalanmayıb, kommunikasiya xətləri açılmayıb.
“Ermənistanın baş naziri bir tərəfdən deyir ki, sülh sazişinin imzalanmasına az qalıb, digər tərəfdən bu cür təxribatlara əl atırlar. Belə vəziyyətdə sülh sazişinin imzalanması da çətin olur. Zənnimcə, vəziyyət bu qayda ilə davam edərsə, Brüsseldə olan şifahi danışıqlar da heç bir nəticə verməyəcək. Ermənistanın daxili və xarici işlər nazirləri bir çox ölkələrdə görüşlər keçirir, müxtəlif yerlərdən məsləhətlər alırlar, eyni zamanda, Rusiyadan xahiş edirlər ki, Azərbaycanı durdursun”, – politoloq qeyd edib.
Onun sözlərinə görə, hazırda bizi ciddi narahat edən iki məsələ var. Biri Ermənistanla olan münaqişədir, digəri sülh sazişi, kommersiya xətləri, sərhədlərin müəyyənləşməsi ilə bağlı məsələdir: “Müharibə bitib, biz öz mövqelərimizdə möhkəmlənmişik, yenə də xəbərlər gəlir ki, atəşkəs pozulur, Ermənistan öz işğalçı niyyətindən əl çəkmək istəmir. Qarabağda baş verən məsələlərin Ermənistanla heç bir əlaqəsi yoxdur. Artıq Qarabağda baş verənlər bizim daxili işlərimizdir. Bunu nə Minsk qurupu, nə də ATƏT-lə müzakirə etmirik.”
Millət vəkili Aydın Hüseynov isə bildirdi ki, son günlər ermənilər sərhəddə təxribat törədir və təxribatın səbəblərindən biri də ermənistanın daxilindəki çaxnaşmalardır ki, onlar bu təxribatlarla daxili auditoriyanın fikrini yayındırmağa çalışır:
“Erməni müxalifəti Nikol Paşinyana qarşı çağırışlar edir, istehva verməsini, hakimiyyətdən getməsini tələb edirlər. Digər tərəfdən Brüssel görüşlərindən də gördüyümüz kimi, artıq Ermənistanın bütün iddialarına son qoyulub. Onlar ümid edirdilər ki, Qarabağda yaşayan ermənilərlə bağlı hər hansı bir status məsələsi müzakirə obyekti ola bilər, lakin bu baş tutmadı. Ermənilər diqqəti cəlb etmək, beynəlxalq qüvvələri bura yönəltmək üçün Azərbaycan sərhədlərini atəşə tutur. Bununla belə, onlar da görür ki, Azərbaycan dövlətinin bu gün apardığı siyasət düzgündür. Dövlətimiz öz ərazi bütövlüyünü qoruyur və qoruyacaq. Azərbaycan ordusu həmçinin dövləti öz suveren hüquqlarını yüksək şəkildə qorunması istiqamətində bütün tədbirləri həyata keçirir. Əgər ermənilər bu kimi təxribatlara son qoymasa, əlbəttə, Azərbaycan ordusu öz gücünü göstərmək məcburiyyətindədir. Bizim başqa çıxış yolumuz yoxdur. Dövlətimizin xarici siyasəti, bütövlükdə dünyada apardığı siyasət bununla səciyyələnir ki, Azərbaycanın başqa bir dövlətə ərazi iddiası yoxdur. Özünün beynəlxalq hüquq tərəfindən tanınan sərhədləri çərçivəsində süveren hüquqlarını, milli və dövlətçilik maraqlarını qorumağa qadirdir. Ermənistanın bu təxribatının qarşısının alınması Azərbaycan silahlı qüvvələrinin birmənalı hüququdur. Ali baş komandanın ifadəsi, Azərbaycan cəmiyyətində formalaşan gözəl fikir var: “Dəmir yumruq hər zaman yerindədir”.
Qeyd: Məqalə Azərbaycan Respublikasının Medianın İnkişafı Agentliyinin maliyyə dəstəyi ilə və müsabiqə şərtlərinə uyğun olaraq “İctimai və dövlət maraqlarının müdafiəsi” mövzusunda hazırlanıb.
Ayşən Azadova
Medianews.az
