Media
Əməkdar artist, Bakı Uşaq və Gənclər Teatrının direktoru-bədii rəhbəri İntiqam Soltan Medianews.az-ın suallarını cavablandırdı. Qeyd etdi ki, bu gün teatrlarımıza ögey münasibət bəslənir. Xüsusən də hazırda cəmiyyətimizdə teatrı sevən məmur qıtlığı var.
– Artıq yeni mövsüm başlayır. Tamaşaçıları hansı yeniliklərlə təəccübləndirməyi düşünürsünüz?
– Bu sual məni də düşündürür. O, isə vəziyyətin acınacaqlı olmasından xəbər verir.
– Niyə belə düşünürsünüz, aktyor qıtlığıdır yoxsa başqa məsələlər də var?
– Cəmiyyətimizdə teatrı sevən məmur qıtlığı var. Onlar teatrı bəlkə də sevirlər, lakin mən bu sevgini hələ ki, hiss etmirəm. Bəlkə də hansısa əbləh direktor deyəcək ki, yox mən hiss edirəm. Necə deyim ki, nə mənə müxalifətçi damğası vurulsun, nə də əbləhlik olsun. Missiyamız hər zaman maarifləndirmə olub. Bu il də istiqamətimiz dəyişməyəcək. İlkin olaraq, yapon nağıllarının tamaşası planda var, həmçinin ikisi İran, biri Türkiyə, biri isə Gürcüstan olmaqla 4 müxtəlif ölkələrdən dəvət almışıq. Təhsil Nazirliyi ilə birgə güclü işlər aparılır, maraqlı layihələr var. Eyni zamanda uzun zamandır üzərində işlədiyim, uşaqların, gənclərin zərərli vərdişlərdən uzaq olması mövzusunda layihəni təqdim edəcəm. Bu isə Azərbaycanda bir ilkdir.
– Uşaqları və gəncləri teatra necə cəlb edə bilərik?
– Belə bir fikir var: “elə şeylər var ki, onu xalqın müzakirəsinə verməzlər” bu həqiqətən belədir. Teatr tamaşasına baxmağı uşağın ixtiyarına buraxmaq olmaz. Uşağın əlindən tutub, teatra gətirmək lazımdır. Teatrın vəzifəsi isə bundan ibarətdir ki, qapıdan içəri daxil olan uşağın maraq dairəsinə təsir edə bilsin. O zaman bundan sonra uşaq və gənc tamaşaçıya çevriləcək. Ondan sonra o teatrı sevib sevməməyi müəyyən edəcək.
– Bəs teatrın inkişafında dövlətin və cəmiyyətin vəzifələri nələrdir?
– Teatrların məktəbə daxil olmağına şərait yaratmaq lazımdır eyni zamanda dövlət teatrları “öz ərköyün övladı” kimi qəbul etməli və bilməlidir ki, teatrlardan dövlətə və dövlətçiliyə ziyan gəlməz. Çox yaxşı olardı ki, teatr tamaşalarının müəyyən hissəsini Təhsil Nazirliyi, Təhsil İdarələri, Dövlətin müəyyən qurumları, digər hissəsini isə tamaşaçı ödəsin. Burada teatr hansısa məqsəd güdmür, tamaşaçının ödənişi ilə teatr varlanmayacaq. O bilməlidir ki, teatr tüfeyli gəncliyin olmamasına çalışır. Bundan əlavə, Mədəniyyət Nazirliyi ilə Təhsil Nazirliyinin çox zəif əlaqələri var. Uşaqların təqdim olunan tamaşaları daha yaxşı qavraya bilməsi üçün onlar birgə işləməlidir. Bu azyaşlılarda psixoloji və mənəvi baxımdan çaşqınlıq yaranmasının qarşısını alacaq. Hansısa teatrın məktəbdə tamaşa göstərməsi mövzusunu bir nazirlik təkzib digəri təsdiq etməməlidir.
– Teatrınızda istedadlı gənclərin üzə çıxarılması üçün şərait varmı?
-Teatrımızın əsasını peşəkar aktyorlar, ali təhsilli mütəxəssislər təşkil edir ki, onlar uşaqlar üçün oynayırlar. Lakin teatrın nəzdində yaradılmış studiyada bacarıqlı uşaqlar üçün şərait yaradılıb. Onlar burada müxtəlif tamaşalar hazırlayıb, 100-dən çox xarici səfərlərdə olublar.
Aysel Şirinova
Medianews.az
