Media
“Ermənilərə yerini göstərmək və Azərbaycanın öz ərazisində mövqeyini möhkəmləndirməsinə ehtiyac var”
Bunu Medianews.az-a açıqlamasında hərbi ekspert Ramil Məmmədli bildirib.
O qeyd edib ki, ölkəmizdə yaşanan son hadisələr onu göstərdi ki, Azərbaycan öz ədalətli mövqeyini qəbul etdirmək və sona çatdırmaq üçün tək mübarizə aparır:
“Məsələ belədir ki, 10 noyabr 2020 -ci il bəyannaməsindən sonra hərbi əməliyyatların dayandırılması və Azərbaycanın üstün, Ermənistanın isə təslimçi tərəf olaraq bəyannaməyə imza atmasından sonra meydana çıxan yeni format Qarabağdan və Zəngəzur ərazisindən Ermənistan hərbi birləşmələrinin çıxması bölgədə iqtisadi layihələrin, yol infrastrukturunun həyata keçirilməsi ilə bağlıdır. Çox təəssüf ki, Ermənistan hərbi birləşmələri Ağdam, Kəlbəcər, Laçın rayonlarından çıxsalar da, Qarabağın dağlıq hissəsində hələ də ordu birləşmələrini dislokasiya etməkdədirlər. Baxmayaraq ki, bəyannamədən 20 ay keçməsinə az qalıb, Ermənistan Müdafiə Nazirliyinin birinci əlahiddə ordusu və separatçı qüvvələrinin hərbi birləşmələri Qarabağdadır, yəni onlar rus sülhməramlıları olan ərazidədirlər. Vəziyyətin bu yerə gəlib çatmasının isə Ermənistanla bərabər, əsas təqsirkarı Rusiyadır. Niyə Rusiyadır? Ona görə ki, Rusiya bəyannaməyə imza atan tərəf olaraq erməni hərbi birləşmələrinin Qarabağ ərazisindən çıxarılmasına dair prosesin icrasına nəzarəti öz üzərinə götürüb. Çox təəssüf ki, bu işlərin həyata keçirilməsində, yəni ordunun Dağlıq Qarabağdan çıxarılmasında hər hansı ciddi bir təzyiq göstərməyib. Bunun da rəsmi Moskva- ruslar üçün obyektiv və subyektiv tərəfləri vardır. Bizə bu maraqlı deyil, lazım olan odur ki, Qarabağda sülh və əmin-amanlıq bərqərar olunsun, Ermənistan ordusu qarabağdan çıxsın.
10 noyabır 2020-il bəyanatının 4-cü bəndi icra olunmur. Orada erməni ordusunun Dağlıq Qarabağ ərazisini tərk etməsi xüsusi ilə qeyd olunub. Hər iki tərəf bu bəyannaməyə imza atıb, yəni buradan belə bir fikir yaranır ki, Ermənistanın rəhbəri Nikoil Paşiniyan və Rusiyanın lideri Vladimr Putin öz imzalarına hörmət etmirlər. Prosesi idarə etdirmək, sona çatdırmağın lazım olduğunu qəbul etmək istəmirlər. Bu məsələdə öz maraqlarının gəlib çatacağı günü gözləyirlər. Belə olan təqdirdə Azərbaycanın üzərinə düşən məsələ Qarabağda öz gücünü, mövqeyini gücləndirmək və zərurət yarandıqda mövqelərini irəli çəkərək Ermənistan ordusunu uzaqlaşdırmaqdır. Təəssüf hissi ilə bildirmək istəyirəm ki, Qərb dövlətləri, yəni uzun illər münaqişənin həlli ilə məşğul olan ABŞ, Fransa, Böyük Britaniya və digər dövlətlər də bu prosesə laqeyid qalırlar, dolayısıyla Ermənistana dəstək nümayiş etdirirlər. Buna sübut olaraq deyə bilərəm ki, Qarabağdakı bir ovuc mənşəyi bilinməyən ermənilərə yaxın zamanlarda ABŞ Dövlət Departamenti tərəfindən 2.500.000 vəsait ayırılıb. Artıq belə nəticəyə gəlirik ki, Azərbaycan öz ədalətli mövqeyini qəbul etdirmək və sona çatdırmaq üçün tək mübarizə aparır. Beləliklə, 10 noyabr 2020-il bəyannaməsinə əməl olunmadığı halda hərbi əməliyyatların lokal şəkildə, (yəni Qırxqız, Sarıbaba, istiqamətlərində olduğu kimi ) aparılması məcburiyyəti meydana çıxır. Demirəm ki, irimiqyaslı hərbi əməliyyatlar müzakirə mövzusudur, amma belə kiçik əməliyyatlarla ermənilərə öz yerini göstərmək və Azərbaycanın öz ərazisində mövqeyini möhkəmləndirməsinə ehtiyac var”.
Ayşən Azadova
Medianews.az
