Media
Prezident Rəcəb Tayyib Ərdoğan Soçidə Rusiya Prezidenti Vladimir Putinlə görüşməsi barədə xəbə vermişdik.
Medianews.az-ın məlumatına görə, Ərdoğan Akkuyu Atom Elektrik Stansiyasında baş verənlərlə bağlı mühüm mesajlar verərkən, Rusiya lideri Putin də taxıl məsələsi üçün ona təşəkkür edib.
Qeyd edək ki, Prezident Ərdoğanı Soçi Beynəlxalq Hava Limanında Krasnador Regional Administrasiyası rəhbərinin müavini Aleksandr Ruppel, Soçi şəhərinin meri Aleksey Kopayqorodski, Rusiya Dövlət Protokolu baş direktorunun müavini Aleksandr Prusov, Türkiyənin Moskvadakı səfiri Mehmet Samsar, Novorossisk baş konsulu Fırat Bayar və digər rəsmi şəxslər qarşılayıblar.
Prezident Ərdoğan Soçiyə xarici işlər naziri Mövlud Çavuşoğlu, enerji və təbii ehtiyatlar naziri Fatih Dönmez, xəzinə və maliyyə naziri Nurəddin Nebati, milli müdafiə naziri Hulusi Akar, kənd təsərrüfatı və meşə təsərrüfatı naziri Vahit Kirişçi, ticarət naziri Mehmet Muş, Milli Kəşfiyyat Təşkilatı rəhbəri Hakan Fidan, Cumhurbaşkanlığı Əlaqə Başçısı Fahrettin Altun, Prezidentin sözçüsü İbrahim Kalın və Müdafiə Sənayesi sədri İsmail Dəmir ilə gedib.
Rusiya Prezidenti Vladimir Putin Soçidəki görüş zamanı taxılla bağlı razılaşmaların əldə olunmasındakı roluna görə şəxsən Türkiyə Prezidenti Rəcəb Tayyib Ərdoğana təşəkkür edib.
Həmçinin Vladimir Putin Türkiyə Prezidenti Rəcəb Tayyib Ərdoğanla görüşündə “Türk axını”nı Rusiya qazının Avropaya nəqli üçün ən mühüm marşrutlardan biri adlandırıb.
V. Putin əlavə edib ki, “Türk axını” problemsiz işləyir və avropalı tərəfdaşlar buna görə Türkiyəyə minnətdar olmalıdırlar.
Türkiyə lideri Rəcəb Tayyib Ərdoğan isə cavab olaraq bunları deyib: “Mən də sizə çox təşəkkür edirəm. Nümayəndə heyətlərimizin Türkiyədəki görüşləri də səmərəli oldu. Onlar bir çox mövzuları müzakirə etdilər. Bu məsələlərdən sonra problemlərə son qoymağımız həm enerji baxımından, həm də Qara dəniz regionunda çox fərqli bir səhifə açacaq. Taxıl məsələsində də atılan addımlar, turizmlə bağlı aparılan danışıqlar, nəqliyyatla bağlı məsələlər bölgədə Rusiya – Türkiyə üçün çox əhəmiyyətlidir. Bu gün ikitərəfli görüş keçirərək Türkiyə və Rusiyanın bölgədə oynadığı rolu da bir daha göstərdik. Bizim görüşlərimiz bölgəyə də rahatlıq gətirəcək. Terrorla mübarizədə həmrəyliyimiz də önəmlidir”.
Ərdoğan Akkuyu Atom Elektrik Stansiyasından da danışıb: “Akkuyu məsələsi böyük əhəmiyyət kəsb edir. Enerji sahəsində Akkuyu məsələsini sizinlə bir nöqtəyə gətirmək və qərar vermək buradkı prosesi təxirə salmağa imkan verməyəcək”.
Daha sonra Kremlin sözçüsü Dmitri Peskov Türkiyənin Suriya ilə bağlı təhlükəsizlik baxımından narahatlıqlarının olduğunu və bunları nəzərə aldıqlarını bildirib.
Görüşün mətbuata açıq hissəsində çıxış edən Ərdoğan Putinə təşəkkür edib və Tehran səfərindən 17 gün sonra yenidən görüşməkdən məmnunluğunu ifadə edib.
Ərdoğan hər iki ölkənin nümayəndə heyətlərinin Türkiyədə görüşlərinin səmərəli keçdiyini qeyd edib.
“Siyasi, iqtisadi və ticarət sahələrində bir çox mövzular müzakirə olundu. İnanıram ki, bu məsələlərdən sonra indi bu mövzulara nöqtə qoymağımız Türkiyə-Rusiya əlaqələrində fərqli səhifə açacaq. İstər enerji təchizatı, istər Qara dəniz xətti ilə kənd təsərrüfatı məhsulları və taxıl ixracı üzrə atılan addımlar, turizmlə bağlı aparılan danışıqlar, nəqliyyat sahəsi ilə bağlı, eləcə də bölgədə atılan bəzi addımlar nümayəndə heyətlərimizin fəaliyyətinin nəticəsidir. Eyni zamanda bu gün baş tutan ikitərəfli görüşümüz Türkiyənin bölgədə oynadığı rolu ortaya çıxarmaq baxımından olduqca əhəmiyyətlidir”, – deyə Ərdoğan qeyd edib.
Turan Oruc
Medianews.az
