Rusiyanın Ukraynaya hücumları davam edərkən, Ukrayna ordusu Rusiyanın işğal etdiyi əraziləri geri almağa davam edir.
Medianews.az xəbər verir ki, Xerson vilayətinin qubernatoru Dmitri Butriy açıqlamasında Ukrayna Silahlı Qüvvələrinin son 24 saat ərzində Xerson vilayətində daha 7 yaşayış məntəqəsini işğaldan azad etdiyini bildirib və əlavə edib: “Bu günədək 53 yaşayış məntəqəsi rəsmi olaraq işğalçılardan azad edilib. Bu məlumatı yalnız Baş Qərargahla razılaşaraq veririk. Tam nəzarətdən əvvəl müəyyən ərazilərdə minatəmizləmə işləri hərbi qulluqçular tərəfindən həyata keçirilir”.
Dünən Ukrayna ordusunun Xerson Vilayət Hərbi İdarəsi tərəfindən 46 yaşayış məntəqəsinin ruslardan geri alındığı açıqlanıb.
Xatırladaq ki, iyun ayında Putin, Rusiya ordusunun nəzarəti altına aldığı Ukraynanın Xerson şəhərində vətəndaşlıq paylamağa başlayıb. Bundan əlavə Xersonda Ukrayna telefon xətlərinin şəbəkələri kəsilib və Rusiya mənşəli telefon kartları paylanmağa başlanılıb.
Onu da qeyd edək ki, Xersonda yaşayan, lakin Rusiya vətəndaşlığını almaq istəyənlər üçün Rusiya vətəndaşlığı üçün müraciətlər qəbul edilməyə başlanmışdı.
Ukrayna Xüsusi Rabitə və İnformasiya Mühafizəsi Dövlət Xidmətinin bəyanatında “Rusiya işğalçıları Xerson vilayətində şəbəkələrə müdaxilə edərək telefon operatorlarının xətlərini kəsiblər. Yerli sakinlər də internetdən istifadə edə və beynəlxalq zənglər edə bilməyiblər”,-deyə bildirilib.
Leyla, Medianews.az