Media
Tarif Şurası tələbə qəbulu ilə bağlı ödənişli xidmətlərin tariflərini təsdiq edib.
11 xidmət üzrə müəyyən olunan tariflərə görə, bir iştirak üçün minimum məbləğ 30 manatdır.
Qəbul imtahanlarında ödənişli iştirak üçün nəzərdə tutulan ən yüksək məbləğ isə tibb sahəsindədir. Əsas (baza ali) tibb təhsili əsasında rezidenturaya qəbul imtahanı (II mərhələ) üzrə iştirak üçün nəzərdə tutulan ödəniş məbləği bir iştirak üçün ƏDV-siz 100 manat təşkil edir.
Əsas (baza ali) tibb təhsili əsasında rezidenturaya qəbul imtahanı (I mərhələ), bakalavriat (əsas (baza ali) tibb təhsili) səviyyəsinə qəbul imtahanı (II mərhələ) və bakalavriat (əsas (baza ali) tibb təhsili) səviyyəsinə qəbul imtahanı (I mərhələ) iştirak üçün nəzərdə tutulan ödəniş müvafiq olaraq, 60, 50 və 45 manat təşkil edir.
Orta ixtisas təhsili müəssisələrinə tam orta və ümumi orta təhsil bazasında qəbul imtahanı üçün ödənişli məbləğ isə 45 manat müəyyən edilib.
Qeyd edək ki, Prezidentin Sərəncamına əsasən, ilk dəfə ümumi və tam orta təhsil səviyyələri üzrə orta ixtisas təhsili müəssisələrinə, ilk dəfə ali təhsilin bakalavriat səviyyəsinə tələbə qəbulu imtahanında (həm 1-ci, həm də 2-ci mərhələ), ilk dəfə ali və orta ixtisas təhsili müəssisələrinin xüsusi qabiliyyət tələb edən ixtisasları üzrə qabiliyyət imtahanında abituriyentlərin iştirakı dövlət büdcəsinin vəsaiti hesabına həyata keçirilir.
