Media
İtaliyada yerləşən Ferrero şokolad fabrikinin bəzi məhsullarında salmonella bakteriyası aşkar edildikdən sonra məhsullar aprel ayında İngiltərə bazarlarının rəflərindən yığışdırılıb. Belçikanın Arlon şəhərindəki fabrikdə istehsal olunan məhsullar bazarlardan yığışdırıldıqdan sonra İngiltərədə sürpriz yumurta formalı şokoladlar satılmayıb.
Medianews.az xəbər verir ki, İngiltərədəki bəzi bazarlarda bakteriya şübhəsi olmayan Ferrero şokoladlarının satışı davam edərkən, bəziləri ehtiyat tədbiri olaraq bütün Ferrero şokoladlarını satışdan çıxarıb. Səlahiyyətlilər, yeni məhsulların nə vaxt satışa çıxarılacağını hələ ki bilmədiklərini söyləyirlər.
Onu da əlavə edək ki, Böyük Britaniyanın Sağlamlıq Təhlükəsizliyi Agentliyi (UKHSA) may ayında dərc etdiyi son bəyanatında bildirmişdir ki, Böyük Britaniyada salmonella bakteriyasına yoluxma hallarının əksəriyyəti 5 yaşdan kiçik uşaqlarda müşahidə edilib. UKHSA, salmonella bakteriyasının simptomlarına ürəkbulanma, ishal, qusma, qarın sançıları, yüksək hərarət, yorğunluq hissi və titrəmələrin daxil olduğunu açıqlayıb.
Belçikanın Arlon şəhərində yerləşən “Ferrero” şokolad fabrikinin istehsal müəssisələrində salmonella bakteriyasının aşkarlanması ilə əlaqədar Belçika Qida və İstehlakçı Məhsullarının Təhlükəsizliyi Təşkilatı (FAVV) fabrikin istehsal lisenziyasını müvəqqəti olaraq ləğv edib. Qida Standartları Agentliyinin (FSA) şokoladların geri çağırılması qərarının profilaktik tədbir olduğunu elan etməsindən sonra İngiltərə, Belçika, Fransa, Almaniya, İrlandiya və Lüksemburqda Pasxa bayramı öncəsi məhsullar geri götürülüb.
Leyla, Medianews.az
