Avqustun 1-i Müdafiə Nazirliyinin rəsmi “facebook” səhifəsindən paylaşım edilərək əhaliyə müraciət edilib. Məlumatda sosial şəbəkə istifadəçilərinə xəbərdarlıq olunub. Köhnə təlimlərin foto və videolarının yeni məlumat kimi paylaşılmamasının əhəmiyyəti vurğulanıb.
Məsələ ilə bağlı “Qazilər.az” saytının rəhbəri, hərbi jurnalist Rey Kərimoğlu Medianews-a danışıb. O, nazirliyin təkbaşına bu cür saxta informasiyaların qarşısını ala bilməyəcəyini deyib:
“Cəmiyyətdə Müdafiə Nazirliyinə qarşı münasibət birmənalı deyil. Ona görə də nazirlik problemin qarşısını almaq üçün yeni çıxış yolları tapmalıdır. Belə halların təkrarlanmaması üçün Müdafiə Nazirliyi, Mətbuat Şurası, hərbi ekspertlər, hərbi jurnalistlər birləşərək monitorinq qrupu yaratmalı və orada ciddi qərarlar verməlidirlər”.
Rey Kərimoğlu Müdafiə Nazirliyinin rəsmi məlumatına istinadın vacibliyini də qeyd edib: “İstənilən halda Müdafiə Nazirliyinin rəsmi məlumatı olmadan heç bir məlumat paylaşılmamalıdır. Bunun üçün bir çox maarrifləndirmə işləri aparılır. Lakin yenə də qaydaları pozanlarla qarşılaşırıq. Həmin şəxslərə ciddi xəbərdarlıq olunur, hətta Prokurorluğa çağırılaraq cəza alanlar da var. Bu da problemi tam həll etmir. Ona görə də alternativ həll yolu tapmaq vacibdir”.
Xanlar Əlibəy
Medianews.az