Media
“Azərbaycan Milli Elmlər Akademiyasında (AMEA) ciddi şəkildə təmizlənmə işləri aparılmalıdır! İndi bəzi alimlərimiz şəxsi maraqları üçün dondan-dona girirlər. Baxırsan ki, ortada heç bir mübarizələri, ideoloji təbliğatları, fəaliyyətləri yoxdur. O zaman bu akademiya nə ilə məşğuldur?”
Bu sözləri Medianews.az-a açıqlamasında Xalq artisti Şeyx Əbdül bildirib.
O qeyd edib ki, AMEA-nın beynəlxaq səviyyədə heç bir fəaliyyəti yoxdur ki, mədəniyyətimizin, milli-mənəvi dəyərlərimizin, digər xalqlar tərəfindən mənimsənilməsinə elmi müstəvidə aydınlıq gətirilsin:
“Uzun müddətdir ki,Azərbaycan Milli Elmlər Akademiyasının fəaliyyəti ilə bağlı iradlarımı bildirirəm. Bir neçə ay öncə Şakir Qobustanlının Azərbaycan toponimlərinə həsr olunmuş, qayaüstü, xalçaüstü yazılar, kodlar və digər nüanslarla bağlı kitabın təqdimatında iştirak edirdim. Mən də kitabın iş prosesi ilə tanış olduqdan sonra alimlərimizin bəzilərinə öz iradlarımı bildirdim. O zaman dəhşətə gəlmişdim ki, axı bu qədər Azərbaycan elminə, ideologiyasına, tarixin milli-mənəvi dəyərlərinə laqeyd yanaşmaq olmaz.
Təəssüf hissi ilə qeyd edirəm ki, bu gün elm sahəmizdə faciə yaşanır, elmi işçilərimiz, alimlərimiz doğru-dürüst şəkildə öz fəaliyyətləri ilə məşğul olmurlar. Yaşlanmış, aktivlik yaşını keçmiş alimlərimiz hələ də sovet, bolşevik ideologiyasında qalmaqdadırlar. Ancaq elə gənclərimiz də var ki, yenilik etməyə çalışırlar, tədqiqatlar aparsalar da, onlara heç bir imkan yaradılmır. Milli Elmlər Akademiyası heç bir elmi faliyyətlə məşğul deyil.
Elim sahəmiz çökməkdədir, AMEA-nın bütün filialları da daxil, orada çox ciddi şəkildə təmizlənmə işləri aparılmalıdır. Bununla bağlı dövlət səviyyəsində idarə heyəti çağrılmalı, bütün elmi müəssisələrin hamısında seçkilər keçirilməlidir və oraya cavan kadrlar təyin olunmalıdır. Akademiya ciddi sürətdə işə başlamalıdır. Bizim elmi fəaliyyətimiz dünya səviyyəsində tanınmır, çünki ideologiya, təbliğat düzgün aparılmalyıb”.
Ayşən Azadova
Medianews.az
