Media
Avropa İttifaqına (Aİ) üzv ölkələrin xarici işlər nazirləri Rusiyaya qarşı növbəti sanksiyalar paketi barədə razılığa gəliblər, lakin bu, qaz embarqosunu əhatə etməyəcək.
APA xəbər verir ki, bu barədə Macarıstan xarici işlər naziri Peter Siyarto “Facebook”da videomesajında bildirib.
Onun sözlərinə görə, yeni sanksiyalar paketi əsasən mövcud qaydaların aydınlaşdırılmasını ehtiva edir və enerji resurslarının nəqlinə əlavə məhdudiyyətlər tətbiq etmir.
“Biz açıq şəkildə bildirdik ki, “Qazprombank” sanksiya siyahısındadırsa, biz onu dəstəkləyə bilməyəcəyik. “Qazprombank” bizim yeni aldığımız sanksiya təklifinə daxil edilməyib, çünki orada enerji daşıyıcılarının daşınması ilə bağlı heç bir məhdudiyyət yoxdur”, – Siyarto deyib.
XİN başçısı vurğulayıb ki, sənəd qızıla embarqo və dövlət alışlarına, həmçinin əmanətlərin qəbuluna əlavə məhdudiyyətlər təqdim edir.
Peter Siyarto həmçinin qeyd edib ki, 48 nəfər, o cümlədən Rusiya Baş nazirinin müavini, bir neçə Rusiya rəsmisi və Sberbank da daxil olmaqla, 9 təşkilat Aİ-nin sanksiyalar siyahısına əlavə olunacaq.
