Media
Almaniya nəşri yazır ki, ABŞ müttəfiqləri ilə müharibəyə son qoymağın yollarını müzakirə edir
ABŞ hakimiyyəti, eləcə də əsas Avropa müttəfiqləri Ukraynadakı münaqişəyə son qoymağın diplomatik yollarını müzakirə edirlər. Almaniyanın “Welt” qəzetinin yazdığına görə, onlar gizli şəkildə məsləhətləşirlər.
Baş verənlərlə bağlı daha ətraflı məlumat verilməsə də, məqalədə ehtimal edilir ki, avropalı seçicilərin əksəriyyəti münaqişənin “diplomatik həlli”nin tərəfdarıdır.
Bundan əvvəl Almaniya kansleri Olaf Şolts ZDF telekanalına rəy sorğusunun nəticələrini şərh edib. Sorğunun nəticələrinə görə, Almaniya vətəndaşlarının təxminən 50 faizi ərazi güzəştləri bahasına olsa belə, Rusiyaya qarşı sanksiyaların və Ukraynadakı münaqişənin tezliklə dayandırılmasının tərəfdarıdır. Onun sözlərinə görə, məhdudlaşdırıcı tədbirlər “Ukraynanın özünü müdafiə edə bilməsi müddətində” qalacaq.
İyun ayında “The Wall Street Journal” Rusiya prezidenti Vladimir Putinin Aİ liderlərinin ən həssas nöqtəsinə zərbə endirməyi bacardığını yazmışdı. Bu, onların seçki reytinqidir. Söhbət Rusiya liderinin Avropaya qaz nəqli üçün ödəniş şərtlərini dəyişdirmək qərarından gedir. Nəşr qeyd edib ki, Avropanın əsas iqtisadiyyatlarında seçkilər 2023-cü ilin qışına yaxın keçiriləcək. Məhz bu mövsümdə evlərdə, eləcə də Avropa müəssisələrində rus qazının olmaması ən kəskin şəkildə hiss olunacaq.
Ukrayna Prezidenti Volodimir Zelenski hesab edir ki, Kiyevə vaxtında hərbi yardımın göstərilməsi döyüş əməliyyatlarını 2022-ci ilin sonuna qədər başa çatdırmağa imkan verəcək. Bu barədə Ukrayna lideri “CNN” telekanalına müsahibəsində deyib.
“Əgər vaxtında tərəfdaşlarımızdan güclü silahlar gəlsə və Allah bizim tərəfimizdə olsa, ilin sonuna qədər çox şeyə nail ola və müharibəni dayandıra bilərik. Heç olmasa bu müharibənin hərbi hissəsini dayandıra bilərik” deyə, o bildirib.
Zelenski həmçinin ABŞ Prezidenti Co Baydenin Ukraynaya səfər edəcəyinə ümid etdiyini bildirib: “Eşitmişəm ki, o, bu ideyanı dəstəkləyir. Bu səfərə gedən yolda təhlükəsizliklə bağlı bir sıra problemlər var”.
Onun fikrincə, belə bir səfər Ukraynaya kömək edəcək: “Ukraynalılar ABŞ-ı dəstəkləyir, ABŞ-a, eləcə də Böyük Britaniya, Polşa və Baltikyanı ölkələrə etimad çox yüksəkdir”
Bu arada isə məlum olub ki, daha dörd HIMARS raket sistemi Ukraynaya növbəti hərbi yardım paketinə daxil ediləcək. Bu barədə brifinqdə ABŞ Müdafiə Nazirliyinin nümayəndəsi bildirib.
Pentaqon rəsmisinin sözlərinə görə, ABŞ Ukrayna üçün dörd MLRS və sursat tədarük edəcək. Bu günə qədər Ukrayna ABŞ-dan artıq səkkiz belə sistem alıb, ona görə də elan edilmiş tədarükləri nəzərə alaraq, Ukrayna Silahlı Qüvvələrində 12 HIMARS MLRS olacaq. Pentaqon qeyd edib ki, Ukraynaya hərbi yardım Ukrayna tərəfinin müdafiə silahlarına olan ehtiyaclarına əsaslanır. Həmçinin ABŞ Müdafiə Nazirliyinin nümayəndəsi vurğulayıb ki, Vaşinqton Kiyevlə müntəzəm əlaqə saxlayır, o cümlədən Ukraynaya ötürülən hərbi yardımın taleyinə nəzarət edir.
Rusiya silahlı qüvvələri içərisində ABŞ-dan göndərilən M777 haubitsalarının olduğu anqarı məhv edib. Müdafiə Nazirliyindən verilən məlumata görə, anqar Çasov Yar kəndinin yaxınlığında vurulub. Həmçinin Ukrayna Silahlı Qüvvələrinin 30-dan çox hərbi qulluqçusu həlak olub. Rusiya Müdafiə Nazirliyi bildirib ki, Ukrayna Donetskin yaşayış məntəqələrini buradan atəşə tuturdu.
Musavat.com
