“Bəziləri qeyd edirlər ki, sürücü özünü müdafiə edib, lakin belə deyil…”-Hüquqşünasdan açıqlama

Mövzu barədə Medianews.az-a danışan hüquqşünas Turan Abdullazadə bildirdi ki, qeyd olunan hadisədə hər iki tərəfin qanuna və hüquqa zidd davranışı müşahidə olunmaqdadır: “Belə ki, əvvəlcə sərnişin Sənubər Baxşəliyeva sürücünü söyərək daha sonra əlindəki çantayla sürücüyə zərbə endirib. Daha sonra sürücü Aqil Kosayev qadını bərk itələyərək onun avtobusdan arxası üstə yıxılmasına səbəb olaraq qadın yüngül bədən xəsarətləri alıb. Videodan görünür ki, sürücü xəsarət almamış və ya alsa belə çox güman ki, aldığı xəsarətlər məsuliyyət yaratmayan dərəcəsi müəyyən olunmayan xəsarətlərdir”.

“Azərbaycan Respublikası Cinayət Məcəlləsinin 128-ci maddəsinə əsasən sağlamlığın qısa müddətə pozulmasına və ya ümumi əmək qabiliyyətinin cüzi itirilməsinə səbəb olmuş qəsdən sağlamlığa yüngül zərər vurma—1000 manatdan 1500 manatadək miqdarda cərimə olunur. Bundan başqa  240 saatdan 360 saatadək ictimai işlər eyni zamanda bir ilədək müddətə islah işləri, bir ilədək müddətə azadlığın məhdudlaşdırılması və ya bir ilədək müddətə azadlıqdan məhrumetmə ilə cəzalandırılır”.

Vəkil bildirdi ki, bu hadisə də sərnişin də məsuliyyətə cəlb edilməlidir:

“Yəni, ilk baxışdan sürücü Aqil Kosayevin əməlində Cinayət Məcəlləsinin 127-128-ci maddələrindəki cinayətin əlamətləri müşahidə olunur. Sərnişin Sənubər Baxşəliyevanın hərəkətlərində isə ilk baxışdan xırda xuliqanlıq və döymə inzibati xətalarının əlamətləri sezilir. Çünki sərnişin cəmiyyətə açıqca hörmətsiz edən hərəkətlər edərək ictimai qaydanı pozmuş, sürücüyə fiziki ağrı yetirmişdir”.

“İnzibati Xətalar Məcəlləsinin 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə özgənin əmlakının məhv edilməsi, zədələnməsi ilə müşayiət edilməyən hərəkətlərə görə – əlli manatdan yüz manatadək məbləğdə cərimə edilir. İşin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Həmin Məcəllənin 157-ci maddəsinə əsasən döymə və sair zorakı hərəkətlərlə qəsdən fiziki ağrı yetirməyə görə – üç yüz manatdan beş yüz manatadək məbləğdə cərimə edilir və ya işin hallarına görə, xətanı törədənin şəxsiyyəti nəzərə alınmaqla, iki ayadək müddətə inzibati həbs tətbiq olunur”.

Turan Abdullazadənin sözlərinə görə, sürücünün etdiyi sadəcə özünümüdafiə deyildi: “Bəziləri səhvən qeyd edirlər ki, sürücü sadəcə özünü müdafiə edib. Lakin mən burada zəruri müdafiənin olduğunu düşünmürəm. Ən yaxşı halda zəruri müdafiə həddi aşılmışdır. Çünki Cinayət Məcəlləsinin 36.1-ci maddəsinə əsasən zəruri müdafiə vəziyyətində, yəni özünü müdafiə edənin və ya başqa şəxsin həyatını, sağlamlığını və hüquqlarını, dövlətin və cəmiyyətin mənafelərini qəsd edənə zərər vurmaq yolu ilə ictimai təhlükəli qəsddən qoruyarkən törədilmiş hərəkət, zəruri müdafiə həddini aşmamışdırsa, cinayət sayılmır. Yəni, sürücü qadının əl qolunu fiziki qüvvə ilə zərərsizləşdirib onu uzaqlaşdıra biləcəyi halda, onu vuraraq itələmişdir”.

Hüquqşünas qeyd etdi ki, Aqil Kosayevin əməlində cəzanı yüngülləşdirən hallar da müşahidə olunmaqdadır: “Belə ki, Cinayət Məcəlləsinin 59-cu maddəsinə əsasən cinayətin fiziki və ya psixi məcburiyyət təsiri altında, cinayətin zərərçəkmiş şəxsin qanunsuz və ya əxlaqsız hərəkətlərinin təsiri altında törədilməsi cəzanı yüngülləşdirən hal hesab olunur. Cəza təyin edilərkən başqa hallar da cəzanı yüngülləşdirən hal qismində nəzərə alına bilər. Düşünürəm ki, sərnişin Sənubər Baxşəliyevanın sürücünü təhqir edərək çanta ilə vurmağa çalışması, ona fiziki ağrı yetirməsi işə baxan hüquq mühafizə orqanları və məhkəmələr tərəfindən yüngülləşdirici hal qismində nəzərə alınaraq ona daha yüngül cəza veriləcəkdir”.