“Axşam ikisi bir yerdə çıxacaq efirə ki, bu bir zarafat idi”-Prodüserdən sərt sözlər

Aparıcı Zaur Kamalla cənubi azərbaycanlı müğənni Afşin Azəri arasında gərgin anlar yaşanıb. Zaur “Həmin Zaur” verilişində qonaq olan Afşini studiyadan çıxarıb. Onun bu hərəkəti sosial şəbəkələrdə qınağa səbəb olub.

Bəs görəsən aparıcının efirə çağırdığı qonağa qarşı bu cür hərəkət etməsi peşə qaydalarına sığırmı? Aparıcının qonağı efirdən qovması efir etikasına nə dərəcədə uyğun gəlir?

Mövzu ilə bağlı Medianews.az-a açıqlama verən “SOY” prodakşının rəhbəri, tanınmış televiziya rejissoru və prodüseri Oqtay Əliyev bildirdi ki, yəqin bu bir zarafatdır: “Ola bilər ki, özləri razılaşıblar, bu gün deyəcəklər ki, bu bir zarafatdır. Görmədiyim üçün heç nə deyə bilmərəm. Yəqin ki, bir-birlərinə zarafat ediblər”.

Rejissorun sözlərinə görə, bu məsələdə birinci səbəbləri araşdırmaq lazımdır: “Belə bir şey olanda səbəblərini, niyə belədi onu biləndən sonra artıq hər hansı bir fikir söyləmək olar. Amma belə bəlkə onlar zarafat ediblər. Axşam ikisi bir yerdə çıxacaq efirə ki, bu bir zarafat idi. Və ya sonra məlum olacaq ki, ona artıq söz deyib, Zaur da küsüb. Onu bilmirik. Araşdırmaq lazımdır ki, nə məsələdir. Araşdırandan sonra bilinər ki, kim günahkardır, onun da cəzasını verərlər. Efirdə bu günə kimi heç kim heç kimi qovmayıb, nə də yola salmayıb”.