Dünən Həsən bəy Zərdabinin doğum günü idi. Media ekspertləri deyir ki, biz Həsən bəy Zərdabinin qoyub getdiyi mətbuatı qoruyub saxlaya bilməmişik. Bəs doğrudan da biz həqiqətən onun qoyduğu ənənələrə sadiq qala bilməmişik?
Medianews.az-a danışan media eksperti Zeynal Məmmədli bildirdi ki, birinci bəzi suallara cavab tapmaq lazımdır: “Həsən bəy Zərdabinin çox gözəl sözü var: “Qəzet xalq həyatının aynasıdır”. Azərbaycanın özünü peşəkar sayan media qurumlarını gözdən keçirəndə bu aynada nə görürük? Bu xalqın ortaq yaddaşında nələr danılmazdır? Xalq hansı əskiklərinin fərqindədir və aradan qaldırılması üçün nələr edir və nələr edəcək? Sualları mütləq artırmaq və dolğun cavab aramaq gərək. Azərbaycan toplumunun nələrə oturuşmuş və çağdaş, həm də demokratik sayılan baxışları var? Cavab verə bilmiriksə, demək, Zərdabi mediasının hədəflərindən çox uzağıq, axı “Əkinçi” adi bir media olayı deyil, toplum yaşamının hər sahəsini əhatə etməyə, cikinə-bikinədək göstərməyə can atan aynadır. Suala universitet müəllimləri, cürbəcür mütəxəssislər, sosial kommunikasiya uzmanları və başqaları cavab aramalı, ortaq bir cavab oluşdurmağa çalışmalıdır, məncə. Əsas məsələ, sizin sualınızın daim aktuallığını qoruması və kəsintisiz cavab cəhdlərinin olmasıdır”.
Zərif Ülvizadə
Medianews.az