Media
“Azərbaycan Respublikası Milli Məclisinin deputatının statusu haqqında” qanuna dəyişiklik edilir. Qanuna əsasən millət vəkillərinin maaşları artırılır. Dəyişikliyə görə, Milli Məclisin sədri 3550 manat miqdarında aylıq vəzifə maaşı alacaq. Sözügedən məsələ sosial şəbəkələrdə günün əsas mövzusuna çevrilib.
Mövzu ilə bağlı Medianews.az-a açıqlama verən Müasir Müsavat partiyasının sədri Hafiz Hacıyev bildirdi ki, deputatların maaşının artırılmasına münasibəti heç də birmənalı deyil:
“Əhalinin belə bir acınacaqlı, ölkədə bahalaşma baş alıb getdiyi bir ərəfədə bu deputatlar ancaq özlərinin qayğılarına qalırlar. Millət vəkilləri kasıb deyillər ki, hərəsinin 100 dən çox obyektləri var. Onlardan biri Cavanşir Feyziyev idi ki, getdi xalqın pulunu apardı, yedi, dağıtdı, xaricdə də başını dağladılar. Digərlərinin nəinki Azərbaycanda, xaricdə də böyük biznesləri var. Onlar nə ilə məşğul olublar ki, bu qədər mülkə sahib olublar? Belə çıxır ki, bu müddət ərzində ancaq özlərinə işləyiblər? Büdcədə pul o qədər çoxdursa onu qazilərin pensiyasına, yardımına, müalicəsinə xərcləsinlər. Vətən müharibəsində iştirak etmiş insanlara kömək etsinlər. Millət vəkillərinin maaşı niyə artmalıdır ki, nə iş görüblər axı onlar?
H.Hacıyev qeyd etdi ki, millət vəkilləri heç də kasıb deyil, əksinə onların milyardları var:
“Pulları nə qədər çox olursa olsun yenə də maaşlarını artırmaqla məşğuldurlar. Onları nə qədər söz demək olar? Millət vəkilləri ilə görüşəndə həmişə deyirik ki, xalqın qayğısına qalmaq lazımdır. Öz qayğınıza qalmayın. Milyardlar sahibisiniz, bəsdir, xalqa bu qədər zülm etmək olmaz. Gün keçdikcə bazar məhsulun maya dəyəri artır, ərzaqlar bahalaşır, deputatlar da öz varidatlarının qayğısına qalırlar, əmək haqqlarını artırırlar. Nə olub? Acından ölmürsünüz ki?”.
Zərif Ülvizadə
Medianews.az
