Dünən Azərbaycanın Qarabağ bölgəsində Rusiya sülhməramlılarının müvəqqəti dislokasiya zonasında, Şuşanın Kiçik Qaladərəsi kəndində ermənilər Azərbaycana məxsus yük avtomobilinin hərəkətinə maneə yaradıblar. Hadisənin necə bitdiyi məlum deyil.
Mövzu barədə Medianews.az-a danışan Ağ Partiya sədri, siyasətçi Tural Abbaslı bu kimi hadisələrin tez-tez baş verdiyini bildirdi:
“Burada ermənilərin azərbaycanlıların avtomobil, yaxud hərbi, mülki kolonlarının rusların müvəqqəti nəzarəti altında olan Azərbaycan ərazilərindən keçməsinə maneə törətməsi mütəmadi hal alıb. Bu, əslində, qəbuledilməz və yolverilməzdir. 1989-1990-cı illərdə Qarabağ problemi də məhz belə başlamışdı. O zaman azərbaycanlıların Xankəndiyə, digər ərazilərə gedən zaman yollarını kəsir, daşqalaq edir, avtomobil yollarına təkərləri deşmək üçün xüsusi vasitələr quraşdırırdılar. Əslində, dünyaya və öz daxili auditoriyalarına həmin ərazilərin guya onlara aid olduğu mesajını verirlər. Köhnə taktikadan istifadə edirlər. Yəni guya “bura bizimdir, biz istəməsək, buraxmarıq” deyirlər. Bunlar həm Azərbaycan ictimaiyyətinə, həm də təbii ki, Ermənistanın daxili auditoriyasına hesablanmış addımlardır”.
Siyasətçi “ruslar niyə buna şərait yaradır”? sualına cavab olaraq bildirdi ki, bu məsələdə ruslar və ermənilərin mövqeyi üst-üstə düşür:
“Ruslara sərf edir ki, bu məsələ həll olunmasın, qanayan yara kimi qalsın. Rusiya bundan istifadə edərək həm Ermənistanı, həm Azərbaycanı siyasi, iqtisadi təsir altında saxlamaq istəyir. Yəni Rusiyanın qətiyyən marağında deyil ki, buradakı münaqişə birdəfəlik köklü şəkildə həll olunsun. Ermənilər dünyaya mesaj verirlər ki, “biz Qarabağdan imtina etməmişik”. Orada yaşayan yerli qarabağlılara mesaj verirlər ki, “buralar bizimdir, buradan qaçmayın”. Həm də Ermənistanda etiraz edən, narazılıq bildirən Ermənistan əhalisinə mesaj verirlər ki, “biz dirəniş göstəririk, buralar bizimdir, narahat olmayın”. Amma təbii ki, bunlar onların düşüncəsidir”.
Tural Abbaslı Azərbaycan tərəfinin cavablarına gəlincə qeyd etdi ki, Azərbaycan tərəfi bu məsələləri ilk növbədə konkret, kəskin üslubda tənqid etməlidir:
“Ultimativ qaydada həm Rusiyaya, həm orada yaşayan etnik erməni sakinlərə xəbərdarlıq etməlidir ki, bu, qanunvericiliyə ziddir və növbəti dəfə belə hərəkət olacağı təqdirdə təbii ki, Azərbaycan hərbi müdaxilə ilə öz hüquqlarını bərpa edəcək. Çünki əgər biz bu gün Kürdəmirə gedən zaman Kürdəmirdə yolunu kimsə kəsib Azərbaycan avtomobillərini ora buraxmırsa, dövlətin reaksiyası necə olacaqsa, eynilə də həmin ərazilərdə hərəkət edən zaman bizim yollarımızı kəsən adamlara da reaksiyamız eyni olmalıdır. Təbii ki, bu məqamdan da istifadə edib Rusiyafobiyanın, ruslara qarşı böyük reaksiyanın olduğu bir zamanda onların Qarabağdakı destruktiv fəaliyyətini də tirajlamalıyıq. Yəni getdikcə həmin ərazilərin nəzarətini Azərbaycan silahlı qüvvələri öz əlinə almalıdır. Təbii ki, bunların olmasını istəmiriksə, Xankəndiyə hərbi müdaxiləyə qədər çox kəskin və qətiyyətli addımlar atılmalıdır”.
Zərif Ülvizadə
Medianews.az