Media
İngiltərə kraliçası II Elizabetin taxta çıxmasının 70 illiyini qeyd etmək üçün elan edilən rəsmi bayramın başlamasından sonra Şimali Koreyadan sürpriz jest gəlib.
Medianews.az xəbər verir ki, Şimali Koreya Xarici İşlər Nazirliyindən edilən şərhdə, prezident Kim Çen Inın Elizabeti və Britaniya xalqını təbrik etmək üçün mesaj göndərdiyi qeyd edilib. Mesajın məzmununun təfərrüatları paylaşılmasa da, Pxenyanın bu addımı sürpriz kimi qarşılanıb.
Qeyd edək ki, 2000-ci ildə Şimali Koreya ilə İngiltərə arasında diplomatik əlaqələrin qurulmasından sonra Pxenyan administrasiyasının o vaxtkı Ali Xalq Məclisinin sədri vasitəsilə əvvəlcə 2001-ci ildə, sonra isə müxtəlif vəsilələrlə Kraliça Elizabetə təbrik mesajları göndərdiyi açıqlanıb.
Xatırladaq ki, İngiltərə kraliçası Elizabetin ötən il sentyabrın 9-da 73 yaşını qeyd edən Şimali Koreyaya təbrik mesajı göndərməsi ictimaiyyətə əks olunub. Şimali Koreya mətbuatı mesajda “Koreya Xalq Demokratik Respublikasının xalqı öz milli gününü qeyd edərkən, onlara gələcək üçün uğurlar arzulayıram” ifadələrinin yer aldığını açıqlayıb.
Onu da əlavə edək ki, İngiltərədə Kraliça Elizabetin taxta çıxmasının 70-ci ildönümü qeyd etmələri çərçivəsində elan edilən 4 günlük dövlət tətili dünəndən başlayıb. Bayram günlərində ölkə ərazisində müxtəlif kütləvi tədbirlər və şənliklər keçiriləcək.
Leyla, Medianews.az
