Media
Bu gün Azərbaycan Milli Konservatoriyasının tərkibində İncəsənət Gimnaziyasının 1C sinif şagirdləri Abdulla Şaiq adına Dövlət Kukla Teatrında eksursiyada olublar.
Belə ki, İncəsənət Gimnaziyasının birinci sinif şagirdləri Kukla Teatrında səhnə arxasına keçərək kuklaların hazırlanması prosesini izləyiblər. Şagirdlər kuklaların necə hazırlanması və səhnəyə gələnə qədər hansı proseslərdən keçdiyini öyrəniblər. Onlar nağıl kitablarından oxuduqları qəhrəmanların obrazında hazırlanan kuklalarla bağlı maraqlarını ifadə ediblər.
Daha sonra şagirdlər səhnədə Azərbaycan xalq nağılı “Ana keçinin intiqamı” nağılı əsasında hazırlanan “Şəngülüm, Məngülüm” tamaşasını izləyiblər.
Tamaşanı tanınmış aktrisa Ülviyyə Əliyevanın ifasında izləyən şagirdlər sonra səhnəyə çıxaraq təəssüratlarını bölüşüblər.
Azərbaycan Respublikasının əməkdar müəllimi, sinif rəhbəri Əzimzadə Yaqut Mustafa qızı bildirdi ki, uşaqların xalq nağıllarımızı mütəmadi olaraq teatra gəlib izləmələri onların dünyagörüşünə təsir edir. Belə ki, nağıl dünyasının arxa tərəfi, kulisi hər zaman uşaqlara maraqlı olub: “Bu dərs ilinin sonunda biz də uşaqları teatra daha yaxın salmaq və onlara teatr sevgisi aşılamaq üçün belə bir adddım atdıq. Teatr ən gözəl tərbiyə sahəsidir. Əyani şəkildə insanlara kim olduğunu, cəmiyyətdə tutduğu mövqeni göstərir. Biz uşaqları teatra aparmaq kimi mədəni vərdişi onlara ta kiçik yaşlarından formalaşdırmalıyıq. Bu gün uşaq tamaşalarına gedən şagird sabah yeniyetmə, gənclər üçün hazırlanan tamaşalara gedəcək və beləliklə, biz teatral bir cəmiyyət hazırlamış olacağıq”.
Medianews.az
