Media
“Azərbaycan Kinematoqrafçılar İttifaqını birləşdirmək lazımdır və Şəfiqə xanım Məmmədova da sədr olmalıdır. Rüstəm İbrahimbəyovdan sonra Kinematoqrafçılar İttifaqı başsız qalanda onu birləşdirmək lazım idi. Çünki ordakılar da bizim yoldaşlarımızdır, düşmən deyillər ki. Ona görə bu ikitirəlik nəyə lazımdır ki”.
Bunu Moderator.az-a açıqlamasında kinoşunas Aydın Kazımzadə deyib. A.Kazımzadə bildirib ki, ittifaqı parçalamaqla üzvlərinin də adına xələl gətirdilər:
“Rasim Balayev böyük sənətkardır, amma o təşkilatçı deyil. Rüstəm İbrahimbəyov onu o vaxtı özünə ona görə müavin qoymuşdu ki, özündən başqa ikinci bir adam yox idi ki, o olmayanda ittifaqı idarə etsin. Rasimi buna görə ora qoymuşdu, hər yerə əli çatırdı. Amma orda Rasimin özünü idarə edirdilər. Bir fiqur kimi oturmuşdu və heç bir adama heç bir köməklik etmədi.
Moskvanın Kinematoqrafçılar İttifaqının sədrinə bir gün sual verdilər ki, sən Putin haqqında yaxşı ya pis nə deyə bilərsən? O da cavabında deyir ki, mən nə vaxt ittifaqın sədrliyindən çıxsam, onda fikir söyləyə bilərəm. İndi ittifaqın sədriyəm və mənim ixtiyarım yoxdur ki, Putin haqqında yaxşı və ya pis nəsə danışım. Çünki 1000 nəfərdən çox üzvün adından heç nə deyə bilmərəm.
Rüstəm İbrahimbəyov isə bunu başa düşmədi. Sədr olanda hökumətin əleyhinə çıxdı. Halbuki Azərbaycan Kinematoqrafçılar İttifaqının üç yüz nəfər üzvü var idi və o cümlədən mən də orda üzv idim. Ona görə biz Rüstəmə qarşı çıxdıq. Son zamanlar isə Rüstəm işləmirdi, onun ittifaqda içki içən dostları var idi, onları götürüb yeyib-içməyə gedirdi. O artıq özünü itirmişdi, nə etdiyini bilmirdi. Hökumət əleyhinə çıxmaq onun öz işidir, amma 300 nəfər üzvü başsız qoymuşdu və onların adından danışmağa da icazəsi yox idi. Mən sizə Rusiyanı misal göstərdim.
Ona görə də biz özümüz Kinematoqrafçılar İttifaqı yaratdıq. İndi Rasimin hünəri varsa, ittifaqların birləşməsiylə bağlı təklif versin. Bizim ittifaq yaranandan heç vaxt öz binası olmayıb. Hökumət Evində bir otaqda yerləşib. Birinci ittifaq Rüstəmin teatrında yerləşib, hələ də binası yoxdur. Amma Şəfiqə xanım bina aldı və nəhayət ittifaqın özünün doğma evi oldu. Rüstəm olmayandan sonra Xalq yazıçısı Anar da ittifaqların birləşdirilməsi təşəbbüsüylə çıxış etməliydi. Çünki Anar da orda üzvdür”.
Qeyd edək ki, Rasim Balayev isə rəhbəri olduğu qurumla Xalq artisti Şəfiqə Məmmədovanın rəhbərlik etdiyi, 2012-ci ildə yaradılan qurumun nə vaxtsa birləşə biləcəyini deyib.(Moderator.az)
