“Artıq bu gündən havaların isti keçməsi ilə əlaqədar metrostansiyalarda havalandırma sistemləri işə salınıb və yay qrafikinə keçidə start verilib”.
Bunu Medianews.az-a açıqlamasında “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov deyib.
Qurum rəsmisi bildirib ki, metroda yay qrafiki 2018-ci ildən tətbiq olunur: “Ona qədər il ərzində iki dəfə dəyişdirilib. Bunun müsbət nəticələrini biz ötən müddət ərzində əyani şəkildə müşahidə etdik. Çünki Bakının iqlimi nəqliyyat vasitəsi kimi metronun da mikroiqlim şəraitinə öz təsirlərini göstərir. Bu səbəbdən konkret qrafikin tətbiq olunması ilə yanaşı, davamlı şəkildə monitorinqlər aparılır”.
B.Məmmədov əlavə edib ki, Metropoliten rəhbərliyi davamlı şəkildə Bakının dəyişkən iqlim şəraitini nəzərə alaraq havalandırma qrafikində müvafiq dəyişikliklər edir: “Bütün bunlar havanın hərarətindən, rütubətliliyin səviyyəsindən asılı olaraq tətbiq olunur. Ümumilikdə hazırda yay qrafikinə keçilib və həmin qrafik tətbiq edilir. Lakin fəsil boyu yenə də hava göstərciləri əsas götürüləcək”.
Medianews.az