Belçikanın paytaxtı Brüsseldə Avropa İttifaqına (Aİ) üzv olan 27 ölkənin liderlərinin bir araya gələcəyi Fövqəladə Liderlər Zirvəsi keçiriləcək.
Medianews.az xəbər verir ki, Avropa Şurasının prezidenti Çarlz Mişelin sədrliyi ilə keçiriləcək 2 günlük sammitdə liderlərin əsas gündəm maddələri enerji və ərzaq qiymətləri və Rusiya -Ukrayna müharibəsi oxundakı müdafiə məsələləri olacaq.
Sammitdə Aİ-nin Rusiya neft və qazından asılılığına son qoymaq üçün atılacaq addımların Aİ ölkələrinin təsdiqi də müzakirə olunacaq. Sammitdən əvvəl bəyanatla çıxış edən Aİ-nin Xarici Əlaqələr üzrə Ali Nümayəndəsi və Avropa Komissiyasının vitse-prezidenti Josep Borrell, “bu gün günortadan sonra üzv dövlətlərin başçılarına razılaşma təklifini təqdim edəcəyik” deyə bildirib.
Məlumata görə, Aİ Rusiya-Ukrayna müharibəsi nəticəsində yaranan və artan ərzaq qiymətlərinin həlli yollarını axtaracaq. Ukraynada taxıl məhsullarının Aİ imkanları ilə ölkədən çıxarılması məsələsinin də müzakirə olunacağı sammitdə Afrika ölkələrində aclıq təhlükəsinin də müzakirə olunacağı gözlənilir.
Gərgin bir gündəmlə Brüsseldə keçiriləcək Liderlər Zirvə toplantısında müharibə prosesi ilə alovlanan müdafiə müzakirələri də gündəmdə olacaq. Sammitdə Ukrayna Prezidenti Vladimir Zelenski də videokonfrans vasitəsilə iştirak edəcək.
Leyla, Medianews.az