Son həftələrdə Avropa ölkələrində başda olmaqla bir çox bölgədə ortaya çıxan meymun çiçəyi epidemiyası öz təsirini artırıb.
Medianews.az xəbər verir ki, ilk dəfə Afrikada ortaya çıxan və son həftələrdə Amerika, Avropa və Avstraliyaya yayılan meymun çiçəyi virusu ilə bağlı həyəcan verici bir araşdırma dərc edilib .
İngiltərədəki elm adamları 2018-2021-ci illər arasında meymun çiçəyi virusu hallarını araşdırarkən çox maraqlı nəticə ilə qarşılaşıblar. Belə ki, xəstəliyin 10 həftə bədəndə qala biləcəyi müəyyən edilib. Mütəxəssislər vurğulayıblar ki, çiçək xəstəliyinə bənzər səpgilər yox olduqdan sonra da virus orqanizmdə qala bilir.
Məlumatlara görə, müayinələrdə Nigeriyada xəstəliyə tutulan 40 yaşlarında bir kişinin 76 gün sonra hələ də müsbət olduğu müəyyən edilib. Xəstənin 10 həftəlik müddət ərzində virusu ötürmə riskini daşıyıb-daşımadığı bəlli olmasa da, ekspertlər bunun “ən böyük cavabsız sual” olaraq qaldığını da vurğulayırlar.
Bildirilir ki, tədqiqatçılar 2018-2021-ci illər arasında Böyük Britaniyada 7 fərqli meymun çiçəyi hadisəsinə baxıblar.
Onu da qeyd edək ki, mütəxəssislər meymun çiçəyi virusunun uşaqlarda nadir olduğunu da açıqlayıblar.
İngiltərədə bu günə qədər 71 hadisə aşkar edilsə də, onların əksəriyyətinin gey və biseksual kişilərdə görüldüyü vurğulanıb.
Həmçinin tədqiqatlara meymun çiçəyinin müalicəsi üçün rəsmi icazə verilməyən ”Tecovirimat”ın 2021-ci ildə yoluxmuş bir xəstənin sağalmasına və yalnız bir həftəlik müalicədən sonra xəstəxanadan buraxılmasına kömək etdiyinə dair məlumatlar da daxil edilib.
Xatırladaq ki, meymun çiçəyi virusu Avropa, Amerika, Avstraliya, Afrika və nəhayət Asiyada öz təsirini göstərməkdə davam edir. Nəhayət, Birləşmiş Ərəb Əmirliklərində (BƏƏ) Qərbi Afrikadan olan 29 yaşlı qadında meymun çiçəyi virusunun aşkarlandığı açıqlanıb.
Hava hissəcikləri ilə ötürülən xəstəliyin əlamətlərinə yüksək hərarət, baş ağrısı, əzələ və bel ağrıları, limfa düyünlərinin şişməsi daxildir. Ən bariz simptom üzdə, ayaq altı və ovuclarda şişkinlik kimi tanınır.
Adətən yüngül simptomlarla keçsə də, bəzi hallarda ölümcül ola bilir.
Leyla