Media
Rusiyanın müdafiə naziri Sergey Şoyqu NATO-ya üzv olmaq üçün müraciət edən İsveç və Finlandiyanın onlar üçün təhlükə olduğunu bildirib.
Medianews.az xəbər verir ki, Qərbdə genişlənmənin təhlükəli olduğunu dilə gətirən Şoyqu cavab olaraq sərhəddə 12 hərbi baza qurulacağını açıqlayıb.
Rusiyanın Ukraynaya təcavüzündən sonra NATO-ya rəsmi üzvlük üçün müraciət edən İsveç və Finlandiya Kreml administrasiyasının radarına düşüb. Rəsmi müraciətdən sonra Rusiya lideri Putin iki ölkənin NATO üzvlüyünün onlar üçün təhlükə yaradacağını açıqlayıb. Oxşar bəyanatla Rusiyanın müdafiə naziri Sergey Şoyqu da çıxış edib. Finlandiya və İsveçi qorxudan Şoyqu bu gün verdiyi açıqlamada ABŞ və NATO-nun hərəkətləri səbəbindən Rusiyanın qərb sərhədində hərbi təhdidlərin artdığını bildirib.
“İnterfaks” xəbər agentliyinin məlumatına görə, Şoyqu Finlandiya və İsveçin NATO-ya müraciətinin bu təhlükələr arasında olduğunu vurğulayıb. NATO-nun Qərbdə genişlənməsinin sərhədləri təhdid etdiyini deyən rusiyalı nazir əks addım olaraq sərhədlərdə 12 hərbi bazanın yaradılacağını da əlavə edib.
Şoyqunuin sözlərinə görə, Rusiyanın qərb sərhədlərində hərbi təhdid təhlükəsi çoxalıb: “ABŞ-ın Avropada strateji uçuşlarının sayı 15 dəfə artıb. Amerika gəmilərinin Baltik dənizinə daxil olması sistematik xarakter alıb. Cavab vermək üçün uyğun tədbirlər görəcəyik. Bu şəraitdə döyüşən qoşunların tərkibini ciddi şəkildə təkmilləşdiririk. Bu ilin sonuna qədər Qərb Hərbi Dairəsində 12 hərbi hissə və bölmə formalaşdırılacaq”.
S.Şoyqu daha sonra qeyd edib ki, Baltik Donanmasının gəmiləri tərəfindən yerinə yetirilən döyüş hazırlığı tapşırıqlarının intensivliyi 40 faizdən çox artıb: “Müxtəlif növ silahlardan istifadə etməklə 300-dən çox döyüş təlimi keçirilib”.
Turan Oruc
Medianews.az
