Finlandiya və İsveçin NATO-ya üzv olmaq qərarının “böyük səhv” olacağını deyən Rusiya xarici işlər nazirinin müavini Sergey Ryabkov atılacaq addımın çox böyük nəticələrə səbəb olacağını vurğulayıb.
Medianews.az xəbər verir ki, Xarici İşlər nazirliyinin rəsmisindən sonra Kremldən açıqlama gəlib.
Qeyd edək ki, sözügedən məsələ ilə bağlı Rusiyadan bir-birinin ardınca sərt açıqlamalar gəlir. Rusiya xarici işlər nazirinin müavini Sergey Ryabkov Finlandiya və İsveçin addımını “böyük səhv” kimi qiymətləndirib və bunun çox böyük nəticələri olacağını vurğulayıb.
Sergey Ryabkov bu qərarın Finlandiya və İsveçin gücləndirilə bilməyəcəyini də deyib: “Vəziyyət, təbii ki, şəraitdən asılı olaraq köklü şəkildə dəyişir. Amma bizə aydındır ki, İsveç və Finlandiyanın təhlükəsizliyi bu qərar nəticəsində gücləndirilə bilməz. Onlarda belə illüziyalar olmamalıdır. Hərbi gərginliyin ümumi səviyyəsi artacaq, bu sahədə proqnozlar azalacaq. Çox təəssüf ki, sağlam düşüncə bəzi uydurma müddəalara qurban verilir”.
Kremlin bəyanatında isə “Biz İsveç və Finlandiyanın NATO-ya üzv olmaq qərarını diqqətlə izləyəcəyik. İştirak qitənin təhlükəsizliyini gücləndirmir”, – deyə qeyd olunur.
Ötən gün Rusiya dövlət televiziyası da bildirib ki, Finlandiya və İsveç NATO-ya daxil olduqdan sonra öz ərazilərində hərbi bazalara icazə verərsə, Moskva Avropa sərhədlərində taktiki nüvə silahı yerləşdirə bilər.
Onu da qeyd edək ki, Rusiyanın keçmiş prezidenti və Rusiya Təhlükəsizlik Şurasının sədr müavini Dmitri Medvedev də həftələr əvvəl demişdi ki, Rusiya NATO-nun Nordik genişlənməsinə cavab olaraq Polşa və Litva arasında Kalininqrad xarici zonasında nüvə silahları və hipersəs raketləri yerləşdirə bilər.
Hərbi ekspertlər bunun Rusiyanın nüvə mövzusundakı ən açıq xəbərdarlığı olduğunu vurğulayaraq, bu açıqlamalarla Rusiyanın müxtəlif alternativ planlar qura biləcəyini bildiriblər.
Məsələ ilə bağlı Rusiya Prezidenti Vladimir Putin də Kollektiv Təhlükəsizlik Müqaviləsi Təşkilatının (KTMT) sammitində çıxış edib. Finlandiya və İsveçin NATO-ya qoşulması haqqında danışan Putin Rusiyanın bu dövlətlərlə probleminin olmadığını, bu dövlətlər hesabına genişlənmənin Rusiya üçün bilavasitə təhlükə yaratmadığını vurğulayıb.
“NATO özünün geosiyasi siyasətindən kənara çıxır, digər regionlarda siyasətə təsir etməyə çalışır. Bu, bizdən diqqətli olmağı tələb edir. Bu ərazidə hərbi infrastrukturun genişlənməsi Rusiyanın cavab reaksiyasına səbəb olacaq. Bu reaksiyanın necə olacağına yarana biləcək təhlükələrdən çıxış edərək qərar verəcəyik”, – deyə Rusiya lideri bəyan edib.
Turan Oruc
Medianews.az