Media
Rusiya dünyanın gözü qarşısında Ukraynanı işğal edir, viran qoyur. Çox təssüflər olsun ki, Putini nə sanksiyalar durdurur, nə də dünya onunla bacarır.
Rusiya isə bununla da kifayətlənmir və dayanmır. Belə ki, artıq Rusiyanın Ukraynadan sonra Moldovaya hücum edəcəyi ilə bağlı məlumatlar yayılır. Moldova rəsmiləri isə bu təhlükə haqqında açıqlamlar verir, dünyanın diqqətini çəkməyə çalışır.
Hətta Moldova parlamentinin sədri İqor Qrosu da bu məsələ ilə bağlı açıqlama verərək bildirib ki, Ukraynadakı hadisələr Moldovaya təsir etsə, onlar qonşu dövlətlərdən kömək istəməyə məcbur olacaqlar.
Bu proseslər hara qədər inkişaf edə bilər? Proqnozu verilən Üçüncü Dünya Müharibəsi başlaya bilərmi?
Sosial Tədqiqatlar Mərkəzinin Mətbuat Xidmətinin rəhbəri, beynəlxalq məsələlər üzrə mütəxəssis Əziz Əlibəyli Medianews.az-ın suallarını cavablandıran zaman bildirib ki, bu elə Üçüncü Dünya Müharibəsidir və davam etməkdədir.
“Ukraynadakı proseslərin gedişatı da göstərdi ki, artıq Qərb, xüsusən də ABŞ məsələni növbəti mərhələyə daşıdı və əsas hədəf Rusiyanı tam çökdürməyə qədər davam edəcək hərbi yardımların göstərilməsidir. Bu mənada düşünürəm ki, Moldovanın narahat olması çox təbii məsələdir. Çünki Ukraynaya paralel bölgələrdə artıq müharibənin genişlənməsi və bir növ də müharibənin ərtafı əhatə etməsi Rusiya nöqteyi nəzərindən Qərb üçün təminata ciddi problem yaratmaq kimi düşünülə bilər. Bu faktor üzərindən onların belə addım atmasını təbii hesab etmək olar”.
Siyasi şərhçinin sözlərinə görə, qarşıdurmanın miqyası daha da genişlənəcək.
“Onsuzda qarşıdurma ilə bağlı mövcud vəziyyət elə bir imkanlar doğurur ki, bu, tərəflərdən birinin konkret və qəti məğlubiyyətinə qədər davam edəcək. Ona görə də hələki ciddi toqquşmalar, qarşıdurmalar və bundan sonra da növbəti müharibə areallarının araya çıxmasını müşahidə edə biləcəyik”,- deyə siyasi şərhçi bildirib.
Leyla
Medianews.az
