Media
Prezident İlham Əliyev incəsənət xadimlərinə Azərbaycan Respublikası Prezidentinin mükafatlarının verilməsi haqqında sərəncam imzalayıb. Sərəncamda tanınmış sənətçilər də yer alıb.
Təltif olunanlar arasında Xalq artisti Naibə Allahverdiyeva Medianews.az-a təəssüratlarını bölüşdü:
“Ali Baş Komandanımız, cənab İlham Əliyev hər zaman sənət adamlarına diqqət və qayğı göstərir. Ümumiyyətlə, ot öz kökü üstündə bitər. Ulu öndərimiz Heydər Əliyev də sənətkarlara hər zaman diqqət və qayğı göstərirdi, onun övladı da atasının qoyub getdiyi o ənənəni davam etdirir. Məni prezident mükafatına layiq görən rəhbərimizə Allah can sağlığı versin. Ən böyük sevincim torpaqlarımızın işğaldan azad edilməsi idi ki, biz iki il öncə bu xəbəri aldıq və bu gün də aldığım bu xəbər məni bəxtəvər etdi”.
Naibə Allahverdiyeva hər zaman xalqın sevgisini duyduğunu və həmin sevgi ilə yaşadığını bildirdi: “Bəzən bədbinliyə qapılanda xalqın sevgisini hiss edirəm, o sevgi məni ayağa qaldırır, şöhrətləndirir. Xalqın verdiyi o enerjini, sevgini sevirəm. Cəmiyyət içinə çıxanda insanların sevgisini gördükdə fəxr hissi keçirirəm. Kimsə mənə sosial şəbəkələrdə söz atanda görürəm ki, məni necə müdafiə edirlər. Başqa ölkədə yaşaya bilmərəm.
Bu gün təbrik üçün o qədər zənglər almışam ki, ürəyim dağa dönüb. Çox sevinirəm ki, az-çox incəsənət aləmindəki əməyimin bəhrəsini görürəm. Sənətçi xalqa bağlı olmalıdır. Nə qədər şöhrət qazansa da, nəyi də olsa heç vaxt xalqın qarşsında təkəbbürlü olmamalıdır. Sənətçi xalqın qulu olmalıdır. Bu xalq səni yüksəldir. Xalqın sevgisinə cavab verməlisən. Yoxsa bu gün mənim pulum var, insanları saymayım, olmaz. Məni Naibə edən xalq olub”.
Medianews.az
