ARB-də yayımlanan “Xəbər-ətər” verilişinin ötən günkü buraxılışı milli istiqlal şairimiz Əhməd Cavadın 130 illik yubileyinə həsr edilib. Bu münasibətlə Əhməd Cavadın nəvəsi Anar Axundzadə proqrama dəvət olunub. Efir zamanı aparıcı Zümrüd Bədəlova qonağa “Babanızı görmüsünüzmü?” deyə sual ünvanlayıb.
Onun bu sualı sosial şəbəkələrdə tənqidlərə məruz qalaraq qınaq obyektinə çevrilib.
Medinews.az xəbər verir ki, Azərbaycan Yüksəliş Partiyası Başqanı Anar Əsədli məsələyə münasibət bildirərək, bu görüntüləri milli faciə adlandırıb:
“Milli ruh və şüurda olmayanların hakimiyyətin yuxarı iyeyarxiyasında irəli çəkilməsinin nəticəsidir. Bir Azərbaycan vətəndaşının ən ümdə vəzifəsi Azərbaycan dövlətinə milli şüuru ilə bağlılığıdır. Azərbaycan vətəndaşı yeni qurulmuş ölkəsində milli şüur altında dövlətçilik ideologiyası ilə siyasi tərbiyə alıb, böyüməlidir. Bu, vətəndaş cəmiyyətinin hər bir üzvünə aiddir – sıravi vətəndaşdan yüksək rütbəli məmura qədər”.
Anar Əsədli bildirib ki, milli kimliyini tanımaq həm də bir siyasi tərbiyə anlayışına sahib olmaqdır:
“Siyasi tərbiyəsi olan kəslər isə dövlətə lazım olan kadr məsələsində təfəkkür və vicdan anlayışlarına sahibdirlər ki, bu da ölkənin inkişafının təməl daşlarındandır!
Siyasi fikrin yoxdursa, milli şüurun da olmayacaq. Bizim insanımızı isə hər cəhdlə siyasətdən çəkindirməyə çalışırlar. Anadolu türkləri demiş, oysa ki, həyatımız siyasət.
Status yazıb linç eləməklə heç nəyə nail olmayacaqsınız. Linç etməyə də gərək yoxdur. Bu da səhvdir, çünki öz cahil insanımızdır. Bu biabırçı tablonun ortaya çıxmasında vətəndaş olaraq, “mənim nə suçum var”, – deyə bir düşünün, sonra qərar verin, kimdir günahkar”?
Leyla
Medianews.az