İngiltərənin “The Guardian” qəzetinin paylaşdığı 2013-cü ildə Suriyada çəkilmiş qətliamın videosu bomba kimi gündəmə düşüb.
Medianews.az xəbər verir ki, “The Guardian” qəzeti Əsəd rejiminin Dəməşqin cənubundakı Tadamon rayonunda ən az 41 mülki vətəndaşı qətlə yetirdiyini əks etdirən görüntüləri dərc edib.
Qəzet rejimin bu qırğınla bölgədəki mülki insanlara “müxalifətin yanında olmamaq” üçün ölüm mesaj vermək istədiyini yazıb.
“The Guardian”nın paylaşdığı görüntülərdə Suriya kəşfiyyatçısı olduğu iddia edilən Amjad Youssufun gözləri bağlı və əlləri qandallı olaraq nəzarətə alınan mülki şəxsləri güllələdiyi görünür.
Sözügedən görüntüləri əldə edən qəzetin əməkdaşı Martin Çulov bunları deyib:
“Bu görüntülərin yayımlanması qərarı asan məsələ deyildi, lakin burada böyük ictimai maraq var. Burada Suriya dövlət hərbi birliyi silahsız, gözləri bağlı mülki vətəndaşları edam çuxurunda öldürür və sonra onların cəsədlərini yandıraraq çuxuru doldurur. Vəhşiliyi ilə tanınan Amjad Youssuf hələ də 227-ci bölmədə xidmət edən hərbi kəşfiyyatçıdır”.
Sözügedən videonun rejimin kəşfiyyat xidmətinin törətdiyi cinayətləri üzə çıxarmaq baxımından əhəmiyyətli olduğunu qeyd edən Çulov, “Ümid edirik ki, bu və ortaya çıxa biləcək digər videolar hələ də axtarışda olan minlərlə ailəyə bir qədər ədalət hissi gətirməyə başlayacaq”,- deyə bildirib.
Turan Oruc
Medianews.az