Dövlət Statistika Komitəsi nikahlar və boşanmalarla bağlı rəqəmlər açıqlayıb. Məlumatda bildirilir ki, cari ilin yanvar-fevral aylarında Ədliyyə Nazirliyinin rayon (şəhər) qeydiyyat şöbələri tərəfindən 9606 nikah və 2505 boşanma halları qeydə alınmış və ötən ilin müvafiq dövrü ilə müqayisədə əhalinin hər 1000 nəfərinə nikahların sayı 3,5-dən 5,9-a qədər artmış, boşanmaların sayı isə dəyişməyərək eyni səviyyədə qalıb.
Boşanmalarla bağlı rəqəmlər onu göstərir ki, ölkədə 1 sutkada 42, 1 saat ərzində ölkədə 1-2 boşanma qeydə alınır.
Sosioloq Əhməd Qəşəmoğlu məsələ ilə bağlı Medianews.az saytına açıqlaması zamanı bildirib ki, 3 dəfə SOS siqnalı çalmaq lazımdır. Onun sözlərinə görə, ölkədə bununla bağlı humanitar siyasət dəyişməlidir.
“Humanitar siyasətə mənsub olan adamlar deməlidirlər ki, bu məsələyə niyə reaksiya vermirlər. Bu məsələləri yoluna qoymaq mümkündür. Kimsə deyə bilər ki, “dövr, zaman belədir”, “belə də olmalıdır”. Amma mən bir ağsaqqal, sosioloq kimi deyirəm ki, bu cavabar yalandır.
Hamı sakit oturub baxır. Amma 3 dəfə sos siqnalı çalmaq lazımdır. Çünki boşananların bəziləri elə bilirlər ki, daha yaxı ailə quracaqlar. Düzdür bir hissəsi bunu bacara bilər. Bəs uşaqlar necə olsun? Həmin uşaqlar Azərbaycanın gələcəyidir. Boşanma rəqəmlərinin arxasında Azərbaycanın yeni nəsli dayanır. Bu yeni nəsilə lazımi diqqət göstərməliyik”.
Sosioloqun sözlərinə görə, məsul şəxslər Azərbaycanı Belçika, Avropanın başqa ölkələri ilə müqayisə edirlər. Amma anlamaq lazımdır ki, orada insanlar tamamilə başqa psixologiyadadırlar.
“Orada boşanmalar bizim kimi yara açmır, yeni nəslə zərbə vurmur. Ona görə də necə ki sel, sunami gələndə yığışıb təcili tədbir görürlər, bu məsələ üçün də uyğun strukturlar təcili yığışıb, fikir müzakirəsi aparmalıdırlar.
Hamı gözünü tikib Ailə, qadın, uşaq komitəsinə. Bu komitə tək başına heç nə edə bilməz. Kompleks işlər görülməlidir. Bunun üçün də Milli Məclisin Sosial Siyasət komitəsinin, Prezident Aparatının Humanitar Siyasət şöbəsinin öhtəsinə işlər düşür.
Xalqın taleyi məsələsinə biganə yanaşmaq olmaz”.
Leyla
Medianews.az