Media
İngiltərədə 63 nəfər “Kinder”dən zəhərlənib. İstehsalçı Ferrero şirkəti isə “Kinder” məhsullarını geri çağırır.
İngiltərənin Qida Standartları və İrlandiyanın Qida Təhlükəsizliyi agentliklərinin yaydıqları rəsmi məlumatlara əsasən, İtaliyanın “Ferrero” şirkəti Belçikada yerləşən müəssisəsində istehsal olunan, son istifadə müddəti məhsulun çeşidinə uyğun olaraq 20 aprel-21 avqust, habelə 11 iyul-7 oktyabr 2022-ci il tarixləri olan aşağıdakı cədvəldə qeyd edilən məhsullarında salmonella olması ehtimalını nəzərə alaraq, həmin məhsul partiyalarının əsas satış ölkələri olan İngiltərə, İrlandiya, Almaniya, İsveç, Fransadan geri çağırılmasına dair qərar qəbul edib.
Şirkətin rəsmi açıqlamasında sınaq yoxlamaları zamanı həmin məhsullarda salmonella aşkarlanmadığı bildirilsə də, ehtiyat tədbiri olaraq araşdırmalar bitənədək bu qənaətə gəlindiyi vurğulanır. Eyni zamanda İngiltərə və İrlandiyada uşaqlar arasında salmonella mənşəli zəhərlənmələrə rast gəlindiyi əsas götürülərək, qeyd edilən məhsul partiyalarında salmonella ilə bağlı xüsusi araşdırmalara başlanılıb.
Qeyd edək ki, Ferrero şirkətindən Azərbaycana da məhsullar gəlir.
Azad İstehlakçılar Birliyinin sədri Eyyub Hüseynov məsələ ilə bağlı Medianews.az saytına açıqlaması zamanı bildirib ki, bütün bu işlərə Qida Təhlükəsizliyi Agentliyi nəzarət edir və etməlidir. Lakin ölkədə paradoksal vəziyyət hökm sürür.
“Təəssüflər olsun ki, QTA-nın gömrükdə heç bir rolu yoxdur. QTA gömrükdə oturmadığı üçün məcbur olur ki, mal artıq ölkənin əmtəə bazarına girdikdən sonra nəzarət etsin.
Hökumətin bir tərəfli siyasəti var. Ölkədə biznesin inkişafı, istehlakçının hüququnun qorunmaması siasəti mövcuddur. Buna görə də mal bazara girir və QTA əli, qolu bağlı şəkildə buna kənardan baxmaqla müşahidə edir. Yəni dövlət orqanlarından birinin o birisinin sertifikatını təkzib etməyə cəsarəti çatmır. QTA nümayəndəsi mütləq şəkildə gömrükdə oturmalıdır ki, pis mal bazara girməsin”.
Eyyub Hüseynov “Kinder”lə bağlı məsələyə münasibət bildirən zaman söyləyib ki, həmin partiya mal Azərbaycana girməyib.
“Xarab mal müəyyən partiya mala aid olan anlayışdır. Yəni demək olmaz ki, bu fabrikin mallarının hamısı xarabdır.
Çox təəssüf olsun ki, ölkəmizdə malların geri çağırılma mexanizmi işləmir və yaxud yox dərəcəsindədir. Yeni hazırlanan Qida Təhlükəsizliyi haqqında qanunda bu məsələ nəzərdə tutulub. Məsələn, Sinqapurda istehlakçıya çatdırılmış malın belə geri çağırılma mexanizmi var. Ona görə də Azərbaycanda təhlükəli mal yox deyil”.
Leyla
Medianews.az
