Media
Rusiya ilə Ukrayna arasında müharibəsinin davam etdiyi vaxtda, Moskva-Pekin xəttindən diqqət çəkən bir açıqlama gəlib.
Bizimyol.info xəbər verir ki, Ukrayna və Rusiya arasındakı müharibə başlamamışdan əvvəl, yəni fevralın əvvəlində Rusiya prezidenti Vladimir Putin Çinə səfər etmiş və Çin lideri Si Cinpinlə görüşərək birlik mesajı vermişdi. O zaman verilən açıqlamada isə Rusiya və Çin birgə bəyanat verərək xarici müdaxilələrə qarşı əməkdaşlığı gücləndirmək qərarına gəldiklərini, həmçinin Çinin Ukrayna məsələsində Rusiyaya, Rusiyanın isə Tayvan məsələsində Çini dəstəklədiyi vurğulanmışdı.
Pekində keçirilən bu görüşdən həftələr sonra Rusiyanın Ukraynaya təcavüzünün davam etdiyi bir vaxtda Rusiya xəbər agentlikləri abunəçilərinə son dəqiqə açıqlaması veriblər. Rusiyanın IFAX xəbər agentliyinin məlumatında Rusiya ilə Çin arasında əməkdaşlığın genişləndiyi açıqlanıb.
Rusiya Xarici İşlər Nazirliyinin bəyanatında deyilir: “Rusiya və Çin beynəlxalq şərtlərə meydan oxumaqla əməkdaşlığı genişləndirmək barədə razılığa gəliblər”.
Siyasi şərhçi Elçin Xalidbəyli Medianews.az saytına açıqlaması zamanı bildirib ki, Rusiya Çini özünə müttəfiq hesab edir.
Onun sözlərinə görə, ABŞ və Qərbin həm Rusiyaya, həm də Çinə eyni düşmənçilik münasibəti bu iki dövləti məcburi müttəfiqə çevirir:
“Əslində isə, ABŞ və Qərbin bu münasibəti olmasaydı, Rusiya və Çin düşmən ola bilərdilər.
Məsələ ondadır ki, Çin öz sərhədləri ətrafında Rusiya kimi imperialist dövlət istəmir. Ən önəmli məqam odur ki, Rusiyanın şərq bölgələrinin zəngin təbii ehtiyatları Çinin iştahını qabardır. Əhalisi sürətlə artan Çinin Rusiyanın əsasən boş olan şərq torpaqlarını nə vaxtsa, özünə birləşdirməyin planlarını qurduğu Kremldəkilərə məlum reallıqdır. Hətta bəzi məlumatlara görə, Zəngin çinlilər artıq indidən Rusiyanın Çinlə həmsərhəd bölgələrində böyük torpaq əraziləri satın alıblar.
Yəni, Rusiya və Çin əslində, müttəfiq deyillər. Bu iki dövlət arasında rəqabəti şərtləndirən bir çox siyasi-iqtisadi səbəblər də var.
Ancaq ABŞ və Qərb bu iki dövləti eyni vaxtda hədəf almaqla, onları məcburi müttəfiqə çevirib. İndi Kremldə Rusiyanın xilas edilməsində Çinin verəcəyi dəstəyin həlledici faktorlardan ola biləcəyini anlamamış deyillər. Ona görə də, Kreml rəsmi Pekini ABŞ və Qərbə qarşı ortaq mübarizəyə çəkməyə çalışır.
Təbii ki, ABŞ və Qərb Çinin Rusiyaya dəstək variantını nəzərə almamış deyil. Son vaxtlar əsas xəbərdarlıqların məhz Çinə qarşı yönəldilməsi də qətiyyən təsadüfi xarakter daşımır. ABŞ və Qərb rəsmi Pekinin hər hansı formada Rusiyaya dəstək verəcəyi təqdirdə, Çinə qarşı da sanksiyaların tətbiq olunacağını hər imkanda təkrarlayır”.
Elçin Xalidbəylinin sözlərinə görə, Çinin yaxın vaxtlarda Rusiyaya dəstək verəcəyi o qədər də inandırıcı görünmür:
“Əslində, müşahidələr göstərir ki, ABŞ və Qərb hazırda Çinin Rusiyaya dəstək verməsindən məmnun olardı. Çünki, xüsusilə də Ağ Evin Çini də Rusiya ilə eyni vaxtda sanksiyaların hədəfinə çevirmək niyyətində olduğu nəzərə çarpır. Bu baxımdan, rəsmi Pekinin hələlik, ən azından ABŞ və Qərbin strateji hədəfləri tam aydınlaşana qədər Rusiyaya dəstək verməkdən yayınmağa çalışacağını düşünmək olar”.
Leyla
Medianews.az
