Bu iddialara görə Tramp ən az 24 milyon dollar zərər çəkib …
ABŞ-ın keçmiş prezidenti Donald Tramp 2016-cı il prezident seçkilərində onu Rusiya ilə “sövdələşmə”də ittiham edən demokratlara qarşı tədbir görüb.
Medianews.az xəbər verir ki, Tramp o vaxtkı prezidentliyə namizəd Hillari Klintonu, Milli Demokrat Komitəsini, Ağ Evin milli təhlükəsizlik üzrə müşaviri Ceyk Sallivanı və bir sıra demokratları məhkəməyə verib.
Trampın vəkilləri Florida Cənub Dairə Məhkəməsinə 108 səhifəlik ərizə təqdim ediblər.
“Bu müttəhimlər birlikdə hərəkət edərək, onların Respublikaçı rəqibi Donald Trampın xarici ölkə ilə sövdələşməsi barədə yalan ritorika yayıblar”, – deyə müraciətdə deyilir.
Sözügedən iddialara görə Tramp ən az 24 milyon dollar zərər çəkib.
Rusiya hökumətinin seçkilərə Trampın xeyrinə təsir göstərdiyi iddialarından sonra 2017-ci ildə Robert Müller xüsusi prokuror təyin edilib və Trampın seçki prosesi zamanı kampaniyasının fəaliyyəti araşdırılıb. Təxminən 2,5 illik araşdırmadan sonra Trampı mühakimə etmək üçün heç bir dəlil tapılmayıb və iş bağlanıb.
ABŞ Ədliyyə Nazirliyi Tramp dövründə Con Durhemi xüsusi prokuror təyin edib və Rusiya istintaqının mənşəyi araşdırılmağa başlanıb.
Durhamın araşdırmasında 2 nəfər dəlilləri manipulyasiya etdiklərini və Trampı ittiham etməyə çalışdıqlarını etiraf edib. Daha sonra Rusiya araşdırmasına səbəb olan “Steele” faylının Demokratlar tərəfindən maliyyələşdirildiyi ortaya çıxıb.
Turan Oruc
Medianews.az