ABŞ-dan Ukraynanı işğal edən Rusiyaya qarşı yeni sanksiyalar gəlib.
Medianews.az xəbər verir ki, Ağ Ev Ukrayna müharibəsi kontekstində Rusiyanın ən böyük bankı Sberbank-ın sədri də daxil olmaqla 400-dən çox rus elitası, Duma üzvləri və müdafiə şirkətlərinə qarşı yeni sanksiyaların tətbiq edildiyini açıqlayıb.
Ağ Ev bildirib ki, ABŞ prezidenti Co Bayden Brüsseldə müttəfiqləri ilə Rusiyanın Ukrayna müharibəsinə cavabları ilə bağlı görüşlər keçirib. Bununla bağlı bəyanat da verilib.
Bəyanatda deyilir: “ABŞ Avropa İttifaqı və G7 tərəfdaşlarımızla sıx koordinasiya şəraitində bu gün 400-dən çox şəxs və şirkətə sanksiya tətbiq edib. Bunlara Rusiya elitası, Dövlət Duması, 300-dən çox üzv və müdafiə şirkəti daxildir”.
Sanksiya siyahısına daxil edilənlər:
1.Rusiya parlamentinin aşağı palatası
2.Dövlət Dumasının 328 üzvü,
3. Ölkənin ən böyük bankı sayılan Sberbank-ın baş icraçı direktoru Herman Qref, (şirkətləri, ailə üzvləri)
4.“Sibur” və “Novatek”in Direktorlar Şurasının üzvü Gennadi Timçenko, (şirkətləri, ailə üzvləri)
5.Rusiyanın “Sovcombank”ın idarə heyətinin 17 üzvü
Ağ Evdən verilən açıqlamada Rusiya Ukraynada müharibəni davam etdirdiyi müddətcə bu sanksiyaların davam edəcəyi vurğulanıb. Bundan əlavə, Rusiya müdafiə sənayesinin əsasını təşkil edən və Rusiya helikopterləri və raketləri kimi sistemlər istehsal edən 48 Rusiya dövlət müdafiə şirkəti də sanksiyalara daxil edilib.
ABŞ prezidenti məsələ ilə bağlı Tvitter hesabında “Putinin Ukraynada üstünlük verdiyi müharibəyə cavab olaraq 400-dən çox rus elitasına, millət vəkilinə və müdafiə şirkətinə əlavə sanksiya tətbiq edəcəyimizi elan edirəm. Onlar şəxsən Kremlin siyasətindən qazanc əldə edirlər və bunun da nəticələrinə qatlanmalıdırlar”, – deyə paylaşım edib.
Turan Oruc
Medianews.az