Bakının sağalmaz yaralarından biri Koroğlu və 20 Yanvar ərazilərindəki xaotik vəziyyətdir. Bu ərazilərdə sıxlığın qarşının alınması üçün zaman-zaman işlər görülsə də nəticə dəyişməz olaraq qalmaqdadır.
Sözü gedən ərazilərdəki sıxlığın qarşısını almaq üçün hansı ciddi tədbirlər görülməlidir?
Nəqliyyat məsələləri üzrə ekspert Aslan Əsədov Medianews.az saytının suallarını cavablandıran zaman bildirib ki, Bakının Koroğlu və 20 Yanvar əraziləri şəhər üçün çox əhəmiyyətli, strateji vəzifə daşıyır.
“Bu ərazilərdəki vəziyyətin yaranmasına səbəb isə Bakı şəhəri ətrafı qəsəbələrin, metroya əlçatmaz olan ərazilərin birbaşa Koroğlu və 20 Yanvar metrostansiyalarından istidafə etməsi, son 4-5 ildə mövcud olan 1 manatlıq taksilərin bu ərazilərdə əhaliyə xidmət etməsi və s-dir.
Bunun aradan qaldırılması ilə bağlı görülən tədbirlər isə inzibatidir. Görünən odur ki, bu ərazilərdən istifadə edən sərnişinləri, sürücüləri isə cərimə maraqlandırmır. Onlar nəyin bahasına olur olsun bu ərazidən istifadə etmək istəyirlər. Burada cərimələmək çıxış yolu deyil. Yaxşı olar ki, ərazi böyük parklanma yerinə çevrilsin, taksilər üçün günlük, saatlıq parklanma imkanları yaradılsın. Yolun əsas hissəsi ilə parklanma ərazisinin çəpərlənməsi hesabına bu sıxlığı azaltmaq olar. Düzdür, müəyyən dərəcədə işlər görülür, amma problem qalmaqdadırsa, deməli, tədbirlər effektiv deyil”.
Ekspert bildirir ki, Koroğlu metrosunun üstündəki boş dayanacağın taksi xidmətləri və gediş-gəliş üçün istidafəyə verilməsi məqsədə uyğun olardı.
“20 Yanvar ərazisində isə vəziyyət biraz fərqlidir. Orada genişləndirmə perspektivi yoxdur. Bunun üçün də Bakı-Sumqayıt və Bakının şimal girişində olan qəsəbələrə gediş-gəlişi Biləcəri metrostansiyası tərəfə köçürmək, sıxlığı ərazidən uzaqlaşdırmaq hesabına orada xaotik vəziyyəti aradan qaldırmaq olar”.
Leyla
Medianews.az