Media
Martın 17-nə olan məlumata görə, Azərbaycanda yeni növ koronavirus (COVID-19) infeksiyasına 99 yoluxma faktı qeydə alınıb, 315 nəfər müalicə olunaraq sağalıb.
Nazirlər Kabineti yanında Operativ Qərargahdan verilən məlumata görə, analiz nümunələri müsbət çıxan 8 nəfər vəfat edib.
İndiyədək ölkədə ümumilikdə 791 min 176 nəfərin koronavirus infeksiyasına yoluxması faktı müəyyən edilib, onlardan 780 min 302 nəfər müalicə olunaraq sağalıb, 9 mın 641 nəfər vəfat edib. Aktiv xəstə sayı 1 min 233 nəfərdir.
Son sutkada yeni yoluxma hallarının müəyyənləşdirilməsi ilə əlaqədar 5 min 677, bu günə qədər isə ümumilikdə 6 milyon 651 min 787 test icra olunub.
Qarşıdan isə Novruz bayramı, tətil günləri gəlir. Keçirilən bayram şənlikləri, kütləvi təbdirlər səbəbi ilə bu günlərdə yoluxma saylarında artım müşahidə edilə bilərmi?
İnfeksionist Mərdan Əliyev Medianews.az saytının suallarını cavablandıran zaman bildirib ki, adətən bayram ərəfəsində yoluxma saylarında artım müşahidə edilir, amma bu bayram bunun baş verəcəyi düşünülmür.
“Çünki kollektiv immunitet formalaşıb. Yoluxma saylarında sürətli azalmalar müşahidə edilir. Bu azalma isə digərlərindən fərqli olaraq təbii şəkildə baş verib. Yəni karantin qaydaları hesabına baş verməyib. Ona görə də bundan sonra yoluxma saylarında ciddi artım müşahidə edilməyəcək. Dalğalanmalar ola bilər. Məsələn, 100 yox 200 ola bilər, amma əhəmiyyətli artımlar olmayacaq.
Bəzi ölkələrdə kollektiv immunitet formalaşmayıb. Həmin ölkələrdə artma təhlükələri var. Amma bizdə artım gözləmirik”.
Leyla
Medianews.az
