Media
Uzun sürən pandemiya rejimindən sonra Baş nazir Əli Əsədovun 5 mart tarixində imzaladığı qərara əsasən, dini ritual xidmətlərinin, eləcə də mərasim zallarında, çadırlarda və digər qapalı məkanlarda yas mərasimlərinin təşkilinə və keçirilməsinə icazə verilib.
Pandemiyadan əvvəl ilahiyyatçıların, sadə vətəndaşların qınaq obyektinə çevrilmiş yas mərasimlərindəki israfçılıq məsələsi necə olacaq? Əvvəlki qaydada israfçılıq olacaqmı?
İlahiyyatçı Ağa Hacıbəyli Medianews.az saytına açıqlaması zamanı bildirib ki, ümumiyyətlə çox qəribə haldır ki, israf mözvusunu daha çox yas yerlərində axtarırıq. Onun sözlərinə görə, bir toyda olan israfı 10 yas məclisində görmək mümkün deyil.
“Dinimizə görə israf, harda olunmasından asılı olmaraq, yasaqdır. Hədisi-Şərifdə deyilir ki, “bir dənizin, okenanın kənarında olsanız belə dəstəmaz aldığınız zaman suyu israf etməyin”. Təsəvvür edin ki, insan dənizdən, dəryadan dəstəmaz alırsa, suyu nə qədər israf edə bilər ki? Əslində peyğəmbərimizin burada bizə öyrətmək istədiyi çox dərin mesaj var, yəni müsəlman kültürünü, mədəniyyətini öyrənəcək.
Yas mərasimi əzizlərimizin, yaxınlarımızın köçüb getdiyi bir mərasimdir. Bu mərasimdə qursaq doldurmaqla məşğul olmaq həqiqətən də doğru bir şey deyil. Bir stəkan çay da ehsan verilə bilər. Yemək vermək məsələsi isə dinimizdə yoxdur. Vəfat etməş adamın ailəsi üçün bu kabusdur. İnsanlar var ki, yas mərasimi keçirə bilmək üçün borca-xərcə girirlər, aylarla, illərlə bu pulu ödəməyə çalışırlar. Dinimiz bunu da kökündən həll edib. Həll belədir ki, yas sadəcə 3 gündür. Yəni 3-cü günə qədər həmin yas sahiblərinə qonşular, qohumlar kömək edərlər. Hüzn dəryasına batmış ailəyə ətrafdakı insanlar yemək bişirib gətirər, onlarla birgə yeyərlər. Dinimizin göstərişi budur. Amma əsrlərdən bəri gələn adətlər möhkəmlənib, əhkam halına gəlib. İnsanlar da dini bilgilərdən, maarifdən uzaq qaldıqları üçün dinin yox, daha çox adətlərin üzərində fokslanıblar”.
İlahiyyatçının sözlərinə görə, bunun qarşısının alınması üçün işin təbliğatı ilə məşğul olunmalıdır.
“Qınamaq istəmirəm, amma bu işdə ən çox “molla” dediyimiz qardaşlarımızın rolu böyük olmalıdır. Lakin mənə elə gəlir ki, onlar işi tərsinə çəkirlər. Onlar üçün bu iş günü kimi görünür. Çalışırlar ki, 3-ü, 7-si olsun. Çünki bu günlərdə məclislərin idarəsi üçün mollaya müraciət olunur. Onlar da bu məclislərə qazanc yeri kimi baxırlar. Amma din şüurlanma, mariflənmə, insan ruhuna qəlbinə, insanı Allaha, axirətə bağlayan, onu formalaşdıran əmrlər toplusudur. Bu dəyəri, kainatdan böyük olan mədəniyyəti insanlar kiçik şeylərə xərcləməməlidirlər”.
Leyla
Medianews.az
